भरधाव टिप्पर आणि मोटरसायकल यांची धडक होऊन घडलेल्या अपघातात आंबेवाडीचा एक युवक जागीच ठार झाल्याची घटना सकाळी 10:30 च्या सुमारास हिंडलगा बॉक्साईट रोडवर आंबेवाडी क्रॉस जवळ घडली.
अपघातात ठार झालेल्या मोटरसायकलस्वाराचे नांव निखिल बसवंत कातकर (वय 24, रा. आंबेवाडी) असे आहे. याबाबत समजलेली माहिती अशी की, आज सकाळी साडे दहाच्यासुमारास निखिल बसवंत कातकर हा आपल्या मोटरसायकलवरून हिंडलगा बॉक्साईट रोड मार्गे जात होता.
त्यावेळी बॉक्साइट रोड मार्गे सुळगाकडे भरधाव जाणाऱ्या टिप्परने (क्र. केए 22 बी 1389) मोटर सायकलला जोराची धडक दिल्याने मोटरसायकलवरील निखिल कातकर जागीच ठार झाला.
सदर अपघाताची बेळगाव ग्रामीण पोलीस स्थानकात नोंद झाली असून उत्तरीय तपासणीसाठी मृतदेह पाठविण्यात आला आहे. अपघात घडताच भयभीत चालक टिप्पर सोडून घटनास्थळावरून फरारी झाल्यामुळे पोलिस त्याचा शोध घेत आहेत.
