यंदाच्या 2021 -22 सालात शताब्दी पूर्ण केलेल्या बेळगाव शैक्षणिक जिल्ह्यातील बेळगावच्या सरकारी सरदार्स हायस्कूलसह पाच सरकारी शाळांना 81 लाख रुपयांचा विशेष निधी मंजूर झाला आहे. या निधीतून शाळेत मूलभूत सुविधा उपलब्ध करून देण्याची सूचना सार्वजनिक शिक्षण खात्याच्यावतीने देण्यात आली आहे.
यंदाच्या 2021 -22 सालात शताब्दी पूर्ण केलेल्या राज्यातील सरकारी शाळांना मूलभूत सुविधा उपलब्ध करून देण्यासाठी सरकारने 20 कोटी रुपयांचे अनुदान मंजूर केले आहे. यापैकी 12.63 कोटी प्राथमिक शाळांसाठी तर 7.27 कोटी रुपये माध्यमिक शाळांसाठी आहेत. या निधीचा विनियोग करण्यासाठी संबंधित शाळांनी कृती योजना तयार करून त्याला सक्षम अधिकाऱ्याकडून मंजुरी घेणे आवश्यक आहे. या अनुदानातून आवश्यक ठिकाणी इमारती उभारणे, दुरुस्तीसह मूलभूत सुविधा उपलब्ध करून घेण्यासाठी कार्यवाही करतात येणार आहे. सध्या आर्थिक वर्षातील अंतिम तिमाहीचे सुरू असल्याने निधीचा व्यवस्थित वापर करण्यात यावा.
या संबंधित शाळांनी सार्वजनिक बांधकाम खाते किंवा जिल्हा पंचायत अभियंता विभाग यांच्याकडून मार्गदर्शन घ्यावे. विकास कामे राबविताना आवश्यक नियमांचे पालन करावे, अशा सूचना देण्यात आल्या आहेत. राज्यातील एकूण 34 शैक्षणिक जिल्ह्यातील 143 शाळांना 20 कोटी रुपयांचा हा निधी मंजूर झाला आहे. निधी मंजूर झालेल्या बेळगाव शैक्षणिक जिल्ह्यातील शाळांचा तपशील पुढील प्रमाणे आहे. सरकारी सरदार हायस्कूल : 726 विद्यार्थी -निधी 15 लाख रु., सरकारी कन्नड प्राथमिक शाळा कणबर्गी : विद्यार्थी 605 -निधी 16.50 लाख रु., सरकारी कन्नड शाळा असून चंचनूर, ता. रामदुर्ग : विद्यार्थी 721 -निधी 16.50 लाख रु., सरकारी कन्नड शाळा यरझरवी, ता. सौंदत्ती : विद्यार्थी 470 -निधी 16.50 लाख रु., सरकारी कन्नडी प्राथमिक शाळा अंबडगट्टी, ता. कित्तुर : विद्यार्थी 450 -निधी 16.50 लाख रुपये.
