झटपट पैशाच्या मोहापायी गुंतवणूकदारांची फसवणूक करणाऱ्या कांही कंपन्यांविरुद्ध गेल्या महिन्यात जिल्ह्यातील वेगवेगळ्या पोलीस ठाण्यांमध्ये एफआयआर दाखल करण्यात आले आहेत. जिल्हा पोलीस प्रमुख लक्ष्मण निंबरगी यांच्या पुढाकारातून पोलिसांनी ही कारवाई केली आहे. आता या प्रकरणी नागरिकांना माहिती देण्याचे आवाहन करण्यात आले आहे.
अथणी येथील हल्याळ रोडवर असलेल्या मोहन ज्योती वनमार्ट रिटेल इंडिया प्रा. लि. या कंपनीविरुद्ध भा.द.वी. 420, 511 सहकलम 34 व 21 (1), 21(2) बॅनिंग ऑफ इन रेग्युलेटेड डिपॉझिट स्कीम ॲक्ट -2019 अन्वये संबंधित कंपनीविरुद्ध एफआयआर दाखल करण्यात आले आहे. गुंतवणूकदारांना यासंबंधी माहिती देण्याचे आवाहन पोलिसांनी केले आहे.
या कंपनीत 1 लाख रुपये गुंतवणूक केल्यानंतर दर महा पुढील एक वर्ष 5 हजार रुपये परतावा देण्याची सांगून या कंपनीने मोठ्या प्रमाणात गुंतवणूक करून घेतली आहे. त्याचप्रमाणे आपल्याकडे 1 लाखाचा ग्राहक आणणाऱ्याला दरमहा 7 हजार रुपये कमिशन देण्याचे आमिष दाखविण्यात आले होते एक वर्षानंतर मूळ रक्कम ही परत करण्यात येईल, अशी ग्वाही कंपनीने दिली होती. गुंतवणुकीच्या बदल्यात हमीपत्र बोंड व धनादेश देण्यात आले आहेत. सरकारकडून यासाठी कोणत्याही प्रकारची परवानगी घेतलेली नाही.
फसवणूक करण्यासाठी असा व्यवहार असल्याचा संशय आल्याने पोलिसांनी स्वतःहून एफआयआर दाखल केला आहे. या प्रकरणाची चौकशी सुरू असून गुंतवणूकदार आणि फशी पडलेल्या नागरिकांनी कागदपत्रांसह यासंबंधी माहिती द्यावी, असे आवाहन पोलिसांनी केले आहे. यासाठी मंडल पोलीस निरीक्षक शंकरगौडा बसनगौडर यांची पोलिस स्थानकात प्रत्यक्ष भेट घेऊन माहिती देण्याचे आवाहन करण्यात आले आहे.
अधिक माहितीसाठी 08289 -251203 या क्रमांकावर संपर्क साधण्याचे आवाहनही करण्यात आले आहे. गोकाक, अथणी, चिक्कोडी आणि बेळगाव येथील सहाहून अधिक कंपन्या विरुद्ध एफआयआर दाखल झाला आहे.
