कोरोना विषाणूच्या ओमिक्राॅन व्हेरीएंटचा धोका लक्षात घेऊन बेळगाव सुवर्ण विधानसौध येथे येत्या 13 डिसेंबरपासून आयोजित केले जाणारे विधीमंडळाचे अधिवेशन रद्द करावे, अशी मागणी कर्नाटक राज्य सचिवालय कर्मचारी संघटनेने विधानसभाध्यक्ष विश्वेश्वर हेगडे -कागेरी यांच्याकडे केली आहे.
राज्यातील कांही महाविद्यालयांमध्ये कोरोनाबाधित विद्यार्थी आढळून आल्यामुळे केरळ आणि महाराष्ट्रातून कर्नाटकात येणाऱ्या प्रवाशांसाठी सरकारने आरटी -पीसीआर निगेटीव्ह प्रमाणपत्र सक्तीचे केले आहे. या पार्श्वभूमीवर हजारो लोक बेळगावातील अधिवेशनासाठी जाणार असल्यामुळे संसर्गाचा धोका वाढणार आहे, असे सचिवालय कर्मचारी संघटनेने म्हंटले आहे. दरम्यान अधिवेशनाची जय्यत तयारी केली जात असून केएएस अधिकारी डॉ. सुरेश इटनाळ यांची या अधिवेशनासाठी विशेष अधिकारी म्हणून नियुक्ती झाली आहे.
विश्वेश्वरय्या तांत्रिक विद्यापीठाचे अतिथीगृह आणि सार्वजनिक बांधकाम खात्याचे विश्रामधाम अर्थात सर्किट हाऊस हे मुख्यमंत्री आणि वरिष्ठ नेत्यांसाठी यजमानपद भूषविणार आहे. राज्याच्या कर्मचारी आणि प्रशासकीय सुधारणा खात्याच्या सचिव पी. हेमलता यांनी नुकतीच अधिवेशनाच्या तयारीची पाहणी केली. तसेच अधिकाऱ्यांची बैठक घेऊन त्यांना आवश्यक सूचना केल्या आहेत.
सचिवालय कर्मचाऱ्यांच्या मागणीमुळे बेळगाव येथील हिवाळी अधिवेशनाबातची अनिश्चितता आणखीनच वाढली आहे. ओमिक्राॅन या कोरोनाच्या नव्या व्हेरीएंटच्या प्रादुर्भावामुळे जगभरात पुन्हा जबरदस्त भीती पसरली आहे.
पुढील आठवड्यात कोरोना संसर्गात वाढ न झाल्यास अधिवेशन बेळगावात आयोजित केले जाईल, अन्यथा ते पुढे ढकलण्याचा किंवा बेंगळूर येथेच घेण्याचा निर्णय घेता जाण्याची शक्यता वर्तविली जात होती. मात्र आता सचिवालय कर्मचाऱ्यांनी केलेल्या मागणीमुळे अधिवेशन रद्द होण्याची दाट शक्यता निर्माण झाली आहे.
