कन्नड गुंडांकडून मध्यवर्ती महाराष्ट्र एकीकरण समितीचे अध्यक्ष दीपक दळवी यांच्यावर झालेला भ्याड हल्ला आणि काळे फासण्याच्या निंद्य प्रकारा विरोधात म. ए. समितीच्या नेतृत्वाखाली आज दुपारी भव्य मूक मोर्चा काढून पोलिसात तक्रार नोंदविण्यात आली.
टिळकवाडी येथील व्हॅक्सिन डेपो मैदानावर आयोजित महामेळाव्याप्रसंगी दीपक दळवी यांना काळे फासण्याची संतापजनक घटना घडली. या घटनेच्या विरोधात आज दुपारी पोलिसात रितसर तक्रार नोंदविण्यात आली. यासाठी समितीच्या नेतेमंडळींच्या नेतृत्वाखाली व्हॅक्सिन मैदानापासून टिळकवाडी पोलीस ठाण्यापर्यंत भव्य मूक मोर्चा काढण्यात आला.
पोलीस ठाण्यात तक्रार दाखल केल्यानंतर पोलीस कोणती कारवाई करतात? हे पाहण्यासाठी मोर्चातील कार्यकर्ते तेथेच ठाण मांडून उभे होते. त्यावेळी समितीचे कार्याध्यक्ष माजी आमदार मनोहर किणेकर यांनी तक्रार दाखल करून घेऊन पुढील कायदेशीर कारवाई होण्यास वेळ लागणार असल्यामुळे सर्वांनी शांततेत आपापल्या घरी जावे अशी विनंती केली. त्याचप्रमाणे अध्यक्ष दीपक दळवी यांनी देखील सर्वांना शांततेत घरी किंवा आपापल्या कामधंद्यात जाण्याची विनंती केली.
यावेळी बोलताना दीपक दळवी यांनी कोणीही कितीही दबाव आणला, काहींही प्रकार केले तरी मी मागे हटणारा व्यक्ती नाही, असे स्पष्ट करताच उपस्थितांनी टाळ्यांचा एकच कडकडाट केला. निषेध व्यक्त करणे तसेच मोर्चाने तक्रार नोंदवण्यास जाऊ देण्यास पोलीस तयार नव्हते. तथापि तुमच्या दबावाखाली त्यांनी परवानगी दिली. तेंव्हा लक्षात घ्या की तुमची ताकद किती प्रचंड आहे. कायदेशीर बाजूने पुढे जात असताना माझ्यावर आधीच 25 गुन्हे आहेत. कांही काळजी करू नका. तुम्ही सदोदित माझ्यासोबत आहात. तुमचा प्रतिनिधी म्हणून ते माझ्यावर खटले घालतात. हे खटले घालताना मी दरवेळी गुन्हेगार होतो.
मात्र आज मी तक्रारदार -फिर्याददार आहे, हा एवढा मोठा बदल झाला आहे असे सांगून पार्वतीने मळ काढून गणपती केला. तुम्ही कशाला काळजी करता, या काळ्या शाईचा रंग आम्हाला यशस्वीतेकडे घेऊन जाईल एवढी माझी खात्री आहे, असे दळवी यांनी स्पष्ट केले.
याप्रसंगी मालोजीराव अष्टेकर, प्रकाश मरगाळे, मदन बामणे, ॲड. राजाभाऊ पाटील माजी महापौर शिवाजी सुंठकर, सरस्वती पाटील ,माजी महापौर सरिता पाटील, माजी उपमहापौर रेणू किल्लेकर , नगरसेविका वैशाली भातकांडे, नगरसेवक शिवाजी मंडोळकर ,रवी साळुंखे, आदी नेते मंडळींसह बहुसंख्य कार्यकर्ते उपस्थित होते.
