बेळगाव येथील महाराष्ट्र एकीकरण समितीचे अध्यक्ष व मराठा समाजाचे नेते दीपक दळवी यांच्यावर काही समाजकंटकांनी केलेल्या शाईफेकीचा सांगली जिल्हा मराठा क्रांती मोर्चाने समस्त महाराष्ट्राच्यावतीने जाहीर निषेध केला आहे.
सांगली जिल्हा मराठा क्रांती मोर्चाचे राज्य समन्वयक विलास देसाई व डॉ. संजय पाटील यांनी एका प्रसिद्धिपत्रकाद्वारे दीपक दळवी यांच्यावरील शाई फेकीच्या भ्याड कृत्याचा समस्त महाराष्ट्राच्यावतीने जाहीर निषेध केला आहे. बेळगाव येथे महाराष्ट्र एकीकरण समितीचे अध्यक्ष व मराठा समाजाचे नेते दीपक दळवी यांच्यावर कांही समाजकंटकांनी शाईफेक केली. याचा मराठा क्रांती मोर्चा महाराष्ट्राच्यावतीने जाहीर निषेध करत आहे. महाराष्ट्रातील तमाम मराठा बांधव दीपक दळवी यांच्या पाठीशी पूर्ण ताकदीने उभा आहे, असा तपशील प्रसिद्धी पत्रकात नमूद आहे.
मराठा क्रांती मोर्चाचे सांगलीचे राज्य समन्वयक विलास देसाई व डॉ. संजय पाटील यांच्यासह दिलीप पाटील (कोल्हापूर), विरेन पवार, गणेश काटकर (मुंबई), प्रशांत भोसले, राहुल पाटील (सांगली), रवी मोहिते (सोलापूर), बापू क्षीरसागर (सातारा) व सचिन तोडकर (कोल्हापूर) यांच्या नांवाने हे पत्रक प्रसिद्धीस देण्यात आले आहे.
येळ्ळूर विभाग म. ए. समितीकडून जाहीर निषेध
मराठी भाषिकांच्या महामेळाव्याच्या ठिकाणी मध्यवर्ती म. ए. समितीचे अध्यक्ष दीपक दळवी यांच्यावर भ्याड हल्ल्यासह झालेल्या शाईफेकीचा येळ्ळूर विभाग महाराष्ट्र एकीकरण समितीने जाहीर निषेध केला आहे.
येळ्ळूर विभाग महाराष्ट्र एकीकरण समितीने एका प्रसिद्धिपत्रकाद्वारे हा जाहीर निषेध नोंदविला आहे. मध्यवर्ती महाराष्ट्र एकीकरण समितीचे अध्यक्ष दिपक दळवी यांच्यावर शाईफेक हल्ला झाला. या निंद्य कृत्याचा येळ्ळूर विभाग महाराष्ट्र एकीकरण समिती निषेध करत आहे. कन्नड गुडांनी पोलिस प्रशासनासमोर गुपचुप स्टेजच्या मागून येऊन हल्ला केला. पण आमच्या एक मावळ्याने चौघा गुंडांना अद्दल घडवली जर आमचे त्या जागी दोनमावळे राहीले असते तर त्यांना तिथच आडवे केले असते. तथापी आम्ही या दडपशाहीला घाबरणार नाही. जोपर्यंत सिमाप्रश्न सुटत नाही तोपर्यंत कायदेशीर लढाई बरोबरच आम्ही रस्त्यावरची लढाई लढतच राहणार. दळवी यांच्यावरील हल्ल्याच्या निषेधार्थ उद्या येळ्ळूर बंद! अशा आशयाचा तपशील प्रसिद्धीपत्रकात नमूद आहे. येळ्ळूर विभाग म. ए. समितीचे कार्याध्यक्ष दुदाप्पा बागेवाडी यांनी हे पत्रक प्रसिद्धीस दिले आहे.
