कर्नाटक विधिमंडळाच्या 10 दिवसांच्या हिवाळी अधिवेशनाची आज शुक्रवारी बेळगाव सुवर्ण विधानसौध येथे सांगता झाली. अधिवेशनाचा आज शेवटचा दिवस असल्यामुळे उत्तर कर्नाटकातील समस्यांवर सखोल चर्चा करण्यासाठी पुरेसा वेळ मिळू शकला नाही.
विधान परिषद अध्यक्ष बसवराज होरट्टी यांच्या मते परिषदेमध्ये अनेक विषयांवर अर्थपूर्ण चर्चा झाली. 74 सदस्यांनी अधिवेशनाच्या सत्रात भाग घेऊन जवळपास 11 तास उत्तर कर्नाटकातील समस्यांवर चर्चा केली. बेळगावात विधानपरिषदेचे द्वैवार्षिक सत्र घेतले जावे आणि ते शक्य नसेल तर सत्राचा कालावधी वाढविला जावा, अशी अपेक्षा होरट्टी यांनी यावेळी व्यक्त केली. त्याचप्रमाणे बेळगावात आमदारांसाठी निवासस्थाने बांधण्यावरही त्यांनी जोर दिला.
विधानसभा सभापती विश्वेश्वर हेगडे -कागेरी यांनी अधिवेशनाच्या ‘शून्य’ प्रहरात 24 समस्या मांडण्यात आल्याची माहिती दिली. प्रारंभी 149 प्रश्नांना उत्तरे दिली गेली. त्याचप्रमाणे आमदारांच्या 1921 प्रश्नांना लेखी स्वरूपात उत्तरे देण्यात आली. एकंदर एकूण 52 तासांच्या कामकाजाची नोंद झाली असल्याचे कागरे यांनी सांगितले.
बेळगावात हिवाळी अधिवेशन आयोजित करण्याचा मुख्य उद्देश उत्तर कर्नाटकातील समस्यांवर चर्चा करणे हा होता. परंतु संबंधित चर्चा करण्यासाठी फार कमी वेळ मिळाला.
आज शुक्रवार अधिवेशनाचा शेवटचा दिवस असल्यामुळे उत्तर कर्नाटकातील समस्यांवर सखोल चर्चा करण्यासाठी पुरेसा वेळच नव्हता. दरम्यान विधानसभेने मंजूर केलेल्या विधेयकांपैकी 9 विधेयक विधान परिषदेत संमत करण्यात आली आहेत.
