‘झिका विषाणू’ नवा नसून जुनाच आहे

‘झिका व्हायरस’ अर्थात झिका विषाणू हा नवीन विषाणू नसून तो जुनाच म्हणजे 1945 ते 47 दरम्यान आफ्रिकेत उत्पत्ति झालेला विषाणू आहे. कोणत्याही विषाणूपासून बचाव करण्यासाठी परिसर स्वच्छतेसह आपण आजपर्यंत पाळलेली सॅनिटायझेशन, सामाजिक अंतर राखणे आणि फेसमास्क घालणे तीन सूत्रे यापुढेही पाळली पाहिजेत, अशी माहिती शहरातील होमिओपॅथिक तज्ञ डॉ. सोनाली सरनोबत यांनी दिली.

बेळगाव लाईव्हशी बोलताना डॉ. सरनोबत म्हणाल्या गेल्या दीड-दोन वर्षांपासून दर चार महिन्यांनी एक नवा विषाणू अस्तित्वात येत आहे आणि आपण त्याचा पाठ शिकत आहोत. अल्फा, डेल्टा, डेल्टा प्लस या विषाणूं मागोमाग गेल्या दोन दिवसापासून आपण झिका विषाणू बाबत ऐकत आहोत. केरळमध्ये या विषाणूची 14 जणांना लागण झाली आहे. आफ्रिकेमध्ये 1945 ते 47 दरम्यान उत्पत्ती झालेला हा विषाणू त्यानंतर जगभरात पसरला आणि पुढे अधून मधून त्याचा उद्रेक होत असतो. आता सध्या केरळमध्ये त्याचे कांही रुग्ण आढळले आहेत.

हा विषाणू ईडिस नांवाच्या डासापासून पसरतो. ईडिस डास म्हणजे डेंग्यू पसरवणारा डास होय. हा डास दिवसा देखील आढळतो आणि स्वच्छ पाण्यावरही अंडी घालतो. त्यामुळे आपण घरातील पिण्याचे पाणी आणि वापराचे पाणी झाकून ठेवले पाहिजे. घर आणि परिसर स्वच्छ ठेवणे, याबरोबरच वैयक्तिक स्वच्छता ही ठेवली पाहिजे.

झिका विषाणूचा संसर्ग झाल्यास ताप येऊ शकतो. अंगावर गोवराप्रमाणे बारीक पुरळ येऊ शकतात. सर्दी -खोकला सुरू होतो, कसा खवखऊ लागतो, डोके दुखू लागते, चक्कर येते, कधी कधी डोळे आल्यासारखे डोळे बारीक होतात. थोडक्यात संसर्गजन्य आजाराप्रमाणे सर्व लक्षणे दिसून येतात. अंग दुखतं, स्नायू दुखतात, पाठदुखी सुरु होते, हातपाय दुखू लागतात. ही सर्व लक्षणे डेंग्यू, चिकनगुनिया आणि अगदी कोरोनामधील असिम्टमॅटिक रूग्णांमध्ये देखील आढळून येतात. त्यामुळे झिका विषाणूचा संसर्ग ओळखण्यासाठी कांही चाचण्या कराव्या लागतात, असेही डॉ. सोनाली सरनोबत यांनी सांगितले.

सुदैवाने आपल्या राज्यात या विषाणूचा शिरकाव झालेला नाही. त्यामुळे अजून तरी आपल्याला घाबरण्याचे कारण नाही. तथापि कोणत्याही विषाणूपासून बचाव करण्यासाठी आपण आजपर्यंत पाळलेली सनिटायझेशन, सामाजिक अंतर राखणे आणि फेसमास्क वापरणे ही तीन सूत्रे यापुढे देखील पाळली पाहिजेत. याखेरीज घर आणि परिसर स्वच्छता महत्त्वाची आहे. झिका विषाणू आपल्यापर्यंत पोहोचलेला नसला तरी आपण सर्वांनी खबरदारी घेतली पाहिजे.

यासाठी महामारी असू दे अथवा साथीचे रोग असू दे होमिओपॅथिकमध्ये त्यांच्यासाठी प्रतिबंधात्मक औषधे वापरली जातात. त्याप्रमाणे इमिनो बूस्टर्स अर्थात शरीरातील प्रतिकारशक्ती वाढविणारी औषधे उपलब्ध आहेत. नागरिकांनी या औषधांचा वापर तज्ञ डॉक्टरांच्या सल्ल्याने करावा, असे आवाहन डॉ. सोनाली सरनोबत यांनी शेवटी केले.