केरळमधील ‘झिका’ विषाणूच्या प्रादुर्भाव लक्षात घेऊन बेळगावात खबरदारी घेण्यात येत असून सतत दोन आठवडे प्रवास व रोगाची लक्षणे जाणविणाऱ्या व्यक्तींची वैद्यकीय तपासणी केली जावी. रोगाचे निदान झाल्यास त्वरित उपचार घ्यावेत, असे आवाहन आरोग्य विभागाकडून करण्यात आले आहे.
राज्यात कोरोनाचा प्रादुर्भाव कायम आहे. परिस्थिती नियंत्रणाखाली ठेवण्यासाठी युद्धपातळीवर प्रयत्न केले जात आहेत. त्यामध्ये आता केरळमध्ये ‘झिका’ या विषाणूचे रुग्ण वाढले आहेत. यापूर्वी इडीस या डासांपासून डेंग्यूची लागण होत होती, परंतु आता त्यात झिका विषाणूची भर पडली आहे. त्यामुळे राज्यात खबरदारी घेतली जात आहे. महिला आणि बाल कल्याण विभागाच्या आयुक्तांनी या संदर्भात काळजी घेण्याचे आदेश अधिकाऱ्यांना बजावले आहेत.
दरम्यान, बेळगाव जिल्ह्यातील चेक पोस्ट व सर्व प्राथमिक आरोग्य केंद्रात तपासणी संदर्भात सूचना करण्यात आल्या असून दर आठवड्याला प्राथमिक आरोग्य केंद्र आणि खासगी वैद्यकीय रुग्णालयांना अहवाल देण्याची सूचना करण्यात आली आहे.
एडीस डासापासून झिकाची लागण होते. त्यामुळे परिसर स्वच्छ ठेवावा, पिण्याचे पात्र दोन दिवसांनी स्वच्छ केले जावे, वेळेत कचऱ्याची उचल केली जावी, गर्भवती महिला, प्रसुत महिला, अर्भक आणि तब्येत नाजूक असलेल्या व्यक्तींची विशेष काळजी घेतली जावी, असा आदेश बजावण्यात आला आहे.
झिका विषाणूचे आरोग्यावर होणारे संभाव्य परिणाम लक्षात घेऊन गेल्या 14 जुलै रोजी आरोग्य अधिकारी व कर्मचाऱ्यांना विशेष प्रशिक्षण आयोजित केले होते. परिसर स्वच्छ ठेवणे, कचऱ्याची व्यवस्थित विल्हेवाट लावण्यासह डासांचा प्रादुर्भाव रोखला जावा, असे आवाहन जिल्हा रोग नियंत्रण अधिकारी डॉ. एम. एस. पल्लेद यांनी केले आहे.
