अश्लील सीडी प्रकरणामुळे अडचणीत आलेले भाजपचे पालकमंत्री आणि जलसंपदा मंत्री रमेश जारकीहोळी यांच्या समर्थनार्थ एकाने आत्महत्या करण्याचा प्रयत्न केला. गोकाक येथील आंदोलनादरम्यान गणपती रजपूत (वय ५५) नामक समर्थकाने स्वतःला पेटवून घेऊन आत्महत्येचा प्रयत्न केला. दरम्यान घटनास्थळी उपस्थित पोलिसांनी आग विझविण्याचा प्रयत्न करून अग्निशामक दलाला पाचारण केले.
आपले सावकार अशापद्धतीचे कृत्य करणार नाहीत. त्यांना या प्रकरणात फसविण्यात आले असून त्यांच्यावर झालेला अन्याय आपल्याला सहन होणार नाही. याऐवजी आपण मरण पत्करलेलं योग्य होईल, असे म्हणत त्याने स्वतःला पेटवून घेतले.
सदर इसमाला तातडीने गोकाक येथील रुग्णालयात दाखल करण्यात आले असून त्याच्या दोन्ही पायाला गंभीर दुखापत झाली आहे. आपण आत्मदहन करून सुटलो असतो. आपल्याला कशाला वाचविले? असे सवाल सदर समर्थक करत असून रमेश जारकीहोळी यांच्यावरील आरोप खोटे आहेत, ते मागे घेण्यात यावेत, यामागिक सूत्रधाराला शिक्षा करावी, अशी मागणी सदर समर्थक करत होता.
आंदोलन सुरु असताना टायर पेटवण्यात आले होते. दरम्यान या समर्थकाने जळत्या टायरवर उडी घेऊन आत्महत्या करण्याचा प्रयत्न केला आहे. सदर व्यक्ती ३० टक्के भाजला असून त्याच्यावर गोकाक रुग्णालयात उपचार सुरु आहेत.
https://www.facebook.com/375504746140458/posts/1338986636458926/
