बेळगाव महापालिका निवडणुकीच्या पार्श्वभूमीवर जाहीर करण्यात आलेल्या प्रभाग पुनर्रचनेचा फेरविचार केला जावा यासाठी माजी नगरसेवकांनी दाखल केलेल्या दाव्यासंदर्भात आज सोमवारी निवडणूक अधिकाऱ्यांच्या वकिलांनी कैफियत दाखल केली असून या दाव्याची पुढील सुनावणी येत्या 4 मार्च रोजी होणार असल्याची माहिती खटल्यातील वादी माजी उपमहापौर ॲड. धनराज गवळी यांनी बेळगाव लाईव्हशी बोलताना दिली.
बेळगाव महापालिका निवडणुकीच्या पार्श्वभूमीवर प्रभाग पुनर्रचना आणि आरक्षण जाहीर करण्यात आले आहे. कोणताही बदल न करता पुन्हा 2018 सालची वादग्रस्त प्रभाग पुनर्रचना जाहीर करण्यात आल्यामुळे त्याच्याविरोधात माजी नगरसेवकांनी कर्नाटक उच्च न्यायालयात दावा दाखल केला आहे.
मागील वेळी उच्च न्यायालयाच्या धारवाड खंडपीठासमोर सरकारी वकिलांनी माजी नगरसेवकांनी दाखल केलेल्या दाव्यावर आक्षेप घेण्यासाठी दोन आठवड्याची मुदत मागितली होती.
या कालावधीत प्रभाग आरक्षणाबाबत जारी होणारी अधिसूचना या बाबी लक्षात घेऊन न्यायाधीशांनी दोन आठवड्यानंतर दाव्याची अंतिम सुनावणी करण्यात येईल असे सांगितले होते.
त्यानुसार आज सोमवारी न्यायालय सुरू झाल्यानंतर माजी नगरसेवकांनी दाखल केलेल्या दाव्यासंदर्भात निवडणूक अधिकाऱ्यांच्या वकिलांनी कैफियत दाखल केली आहे. आता या दाव्याची पुढील सुनावणी येत्या 4 मार्च रोजी होणार असून या सुनावणीकडे माजी नगरसेवक व शहरवासीयांचे लक्ष लागून राहिले आहे.
