हिंडलगा मध्यवर्ती कारागृहातील कैद्याने हुबळी येथील एका महिलेला फोनवरून खंडणीसाठी धमकी दिल्याची तक्रार असली तरी तो फोन कॉल कारागृहातून केला गेला नसल्याचे सांगून या आरोपाचा कारागृह प्रशासनाने साफ इन्कार केला आहे.
याबाबत समजलेली माहिती अशी की, हुबळी येथील स्नेहा देसाई या महिलेने हुबळी टाऊन पोलिस स्थानकामध्ये तक्रार नोंदविली आहे. खुनाच्या आरोपाखाली हिंडलगा कारागृहात कैद असलेल्या तौसीफ निप्पाणी या आरोपीने खंडणीसाठी आपल्याला कारागृहातून फोन केला असल्याची तक्रार स्नेहा देसाई यांनी पोलिसांकडे केली आहे. दरम्यान, हिंडलगा कारागृहाचे अधीक्षक कृष्णकुमार यासंदर्भात बोलताना आरोपी तौसीफ याने मोबाईल अथवा लँडलाईन फोनद्वारे फोन केला असेल तर त्याची आपल्याला कांहीच कल्पना नाही. कारण धारवाड येथून हिंडलगा कारागृहात हलविण्यात आलेल्या तौसीफला खटल्याच्या सुनावणीसाठी वेळोवेळी शेजारील जिल्ह्यांमध्ये नेण्यात येते. कदाचित त्या वेळी संधी साधून त्याने संबंधित महिलेला फोन केला असावा असे सांगून तथापि निश्चित असे कांहीच सांगता येत नाही, असे अधीक्षक कृष्णकुमार यांनी स्पष्ट केले आहे.
