बेळगाव लोकसभा पोटनिवडणुकीसाठी अनेक नेत्यांची नांवे चर्चेत येत आहेत. भाजपाच्यावतीने जगदीश शेट्टर यांचे नाव पुढे आले आहे, यासंदर्भात पत्रकारांनी विचारलेल्या प्रश्नाला प्रतिप्रश्न करत मंत्री जगदीश शेट्टर यांनी माझे नाव या निवडणुकीसाठी कसे येऊ शकते? आणि माझे नाव पुढे येण्याचे मूळ कारण कोणते? याचे उत्तर पत्रकारांनीच द्यावे, अशी भूमिका आज जगदीश शेट्टर यांनी मांडली.
आज बेळगावमध्ये भाजप ग्राम स्वराज्य समावेश कार्यक्रम आयोजिण्यात आला होता. या कार्यक्रमानंतर पत्रकारांनी जगदीश शेट्टर यांना घेराव घालत अनेक प्रश्नांचा भडीमार केला. दरम्यान जगदीश शेट्टर यांचे नाव बेळगाव लोकसभा पोटनिवडणुकीसाठी पुढे आले असून जगदीश शेट्टर यांची हि निवडणूक लढविण्याची इच्छा असल्याची शक्यता वर्तविण्यात येत आहे, यावर पत्रकारांनी जगदीश शेट्टर यांची प्रतिक्रिया विचारली. या प्रतिक्रियेवर जगदीश शेट्टर यांनी पत्रकारांना उलट प्रश्न विचारून भंडावून सोडले.
अद्याप या निवडणुकीसंदर्भात कोणतीही घोषणा झाली नसून, माझे नांव यासाठी कसेकाय पुढे येऊ शकते? माझे नांव कोणी चर्चेत आणले याचे मूळ शोधणे गरजेचे आहे. लोकसभा निवडणूक जाहीर झाल्यानंतर हायकमांड उमेदवार निवडीबाबत निर्णय घेईल. सध्या यासंदर्भात कोणतीही चर्चा करणे आवश्यक नसल्याचे त्यांनी मत मांडले.
मी एक सामान्य कार्यकर्ता आहे. यासोबतच राज्याचा माजी मुख्यमंत्री आहे. या नात्याने उमेदवार निवडीबाबत माझे मत मी कोर कमिटीमध्ये नक्कीच मांडेन. आधी लोकसभा निवडणुकीची घोषणा होऊद्या त्यानंतर आपण उमेदवार निवडीविषयी चर्चा करू, असेही मंत्री जगदीश शेट्टर म्हणाले.
मंत्रिमंडळ विस्ताराबाबत मुख्यमंत्र्यांची भेट घेऊन चर्चा करण्याचा विचार असून भाजप हायकमांड आणि वरिष्ठ नेत्यांच्या चर्चेनंतर मंत्रिमंडळ विस्ताराबाबत तसेच एच. विश्वनाथ यांच्याबाबतीत स्वतंत्र अभिप्राय कोर कमिटीच्या बैठकीत आपण मांडू, असेही मत जगदीश शेट्टर यांनी व्यक्त केले.
