बेळगाव शहरातील नीना क्रिकेट अकॅडमीतर्फे आयोजित करण्यात आलेल्या टी -टेन साखळी क्रिकेट स्पर्धेचे अजिंक्यपद सीसीआय संघाने पटकाविले.
कॅम्प येथील युनियन जिमखाना मैदानावर आयोजित या टी -टेन क्रिकेट स्पर्धेची काल सोमवारी यशस्वी सांगता झाली. स्पर्धेच्या अंतिम सामन्यात सीसीआय संघाने प्रतिस्पर्धी बाळू स्पोर्ट्स क्लब संघावर 8 गडी राखून विजय मिळवला. प्रथम फलंदाजी करताना बाळू स्पोर्ट्स क्लबने मर्यादित दहा षटकात 4 गडी बाद 81 धावा काढल्या प्रत्युत्तरादाखल सीसीआय संघाने 6.5 षटकात 2 गडी बाद 86 धावा काढून जेतेपद हस्तगत केले.
अंतिम सामन्यातील सामनावीर पुरस्काराचा मानकरी सीसीआय संघाचा माजिद मकानदार हा ठरला. स्पर्धेचा मालिकावीर पुरस्कार बाळू स्पोर्ट्स क्लबच्या स्वप्निल येळवे याने पटकाविला स्पर्धेतील उत्कृष्ट फलंदाज म्हणून वैष्णव संघामित्रा अर्जुन स्पोर्ट्स आणि उत्कृष्ट गोलंदाज म्हणून रोहित पाटील सीसीआय यांची निवड करण्यात आली.
स्पर्धेचा बक्षीस वितरण समारंभ प्रमुख पाहुणे म्हणून कॅम्प पोलीस ठाण्याचे पीएसआय अशोक कुमार, अझीम खान, शरीफ पिरजादे, शोयब, इम्तियाज अंकलगी, हुसेन गोकाक आणि झाकी सिद्दकी हे उपस्थित होते. या मान्यवरांच्या हस्ते बक्षिसांचे वितरण करण्यात आले.
स्पर्धेसाठी पंच म्हणून अरिफ बाळेकुंद्री, शेहजाद पठाण, रवी कणबर्गी, गौस हाजी व सुजित बसरीकट्टी यांनी, तर स्कोरर म्हणून प्रमोद जपे आणि समालोचक म्हणून अनिल कुडतरकर व नासीर पठाण यांनी काम पाहिले.
