शॉर्ट सर्किटमुळे लागलेल्या आगीत झेरॉक्स दुकानाचे लाखो रुपयांचे नुकसान झाले असून ही घटना गुरुवारी सायनाकली चिकोडी येथील जुन्या तहसीलदार कचेरीसमोर घडली आहे.
जयश्री उदय कुगे यांच्या दुकानाला आग लागली असून या दुकानाशेजारी सातवे वरिष्ठ सत्र न्यायालय तसेच सीपीआय कचेरी, भूमी अभिलेखा कार्यालय आहे.
आगीचे लोळ अधिक जाणवल्याने नागरिकांनी तात्काळ पोलिसांना पाचारण केले. तसेच अग्निशामक दलाला याची माहिती कळविली. अग्निशामक दलाच्या कर्मचाऱ्यांनी ही आग आटोक्यात आणली.
आग लागलेल्या परिसरात अनेक सरकारी कार्यालये आहेत. त्याचप्रमाणे आजूबाजूला अनेक दुकाने आहेत. जागरूक नागरिकांनी तात्काळ अग्निशामक दलाला पाचारण केल्यामुळे ही आग आटोक्यात आली.
सुदैवाने दुकान मालक जयश्री कुगे याही दुकानाबाहेर असल्यामुळे कोणतीही जीवितहानी झाली नाही. आणि पुढील अनर्थ टळला. अग्निशामक दलाचे अधिकारी विजयकुमार बडिगेर यांच्या मार्गदर्शनाखाली ही आग आटोक्यात आणण्यात आली.
