बेळगाव रेल्वे स्थानकाच्या विकासाचे कामकाज हाती घेण्यात आले असून आज हुबळी नैऋत्य रेल्वे विभागाचे जनरल मॅनेजर अजयकुमार सिंग यांनी कामकाजाची पाहणी केली.
गुरुवारी सकाळी बेळगाव भेटीसाठी दाखल झालेल्या अजयकुमारांनी रेल्वे अधिकाऱ्यांसह बेळगावच्या रेल्वेस्थानकाला भेट दिली. तसेच येथे सुरु असलेल्या विकासकामांची लवकरात लवकर पूर्तता करण्यासाठी संबंधित विभागाला सूचना दिल्या.
मिरज-लोंढा डब्लिंग प्रकल्पांतर्गत १७० कोटी रुपयांच्या खर्चातून बेळगावमध्ये रेल्वे स्थानकाचे प्रवेशद्वार यासह कोचिंग टर्मिनल निर्मितीसाठी बेळगाव रेल्वे स्थानक हायटेक करण्यात येत असल्याचे त्यांनी सांगितले. मार्च २०२२ मध्ये ही विकासकामे पूर्ण होतील अशी अपेक्षा होती.
परंतु कोविड च्या पार्श्वभूमीवर या कामांना विलंब झाला असून स्थानकाच्या दुसऱ्या प्रवेशद्वाराचे काम प्रगतीपथावर असल्याचे ते म्हणाले. बेळगाव रेल्वे स्थानकाचा विकास हायटेक पद्धतीने करण्यासाठी या स्थानकाला राणी कित्तूर चन्नम्मा यांच्या किल्ल्याचा लूक देण्याचे स्वप्न रेल्वे राज्य मंत्री कै. सुरेश अंगडी यांचे होते. परंतु त्यांच्या अचानक जाण्याने त्यांचे हे स्वप्न पूर्ण करण्याची जबाबदारी प्रशासनाची असून लवकरात लवकर या स्थानकाचे विकासकाम पूर्ण करावे, अशी सूचना त्यांनी अधिकाऱ्यांना दिली.
