पिरनवाडी येथील संगोळी रायण्णा पुतळा बसविल्यावरून सुरु झालेल्या वादासंबंधी जिल्हाधिकारी आणि संबंधित अधिकाऱ्यांशी चर्चा करून योग्य ती कारवाई केली जाईल, अशी माहिती शहर पोलीस आयुक्त के. त्यागराजन यांनी दिली आहे.
काल मध्यरात्री अनधिकृतपणे क्रांतिवीर संगोळी रायण्णांचा पुतळा बसविण्यात आला होता. पिरनवाडी येथे छ. शिवाजी चौकात गेली २० वर्षे छत्रपती शिवरायांची मूर्ती ग्रामस्थांच्यावतीने स्थापन करण्यात आली आहे. त्यासमोरच संगोळी रायण्णांची मूर्ती बसविण्यात आल्यामुळे वाद निर्मांण झाला. घटनास्थळी पोलिसांनी हजेरी लावली.
या दरम्यान दोन गटांनी वातावरण बिघडविण्याचा प्रयत्न केला. जोरदार घोषणाबाजी केल्यामुळे अशांततेचे वातावरण पसरले. यावेळी कोणताही अनुचित प्रकार घडू नये यासाठी पोलिसांनी जमावावर लाठीचार्ज केला. पुतळा बसविण्यासंदर्भात जिल्हाधिकारी आणि इतर स्थानिक लोकप्रतिनिधी तसेच संबंधित अधिकाऱ्यांची बैठक घेऊन चर्चा करण्यात येणार आहे. परंतु तरीही सामाजिक सलोखा बिघडविण्याचे कारस्थान काही गटाकडून करण्यात आले.
यामुळे लाठी चार्ज करावा लागला, त्यानंतर परिस्थिती नियंत्रणात आली आहे, अशी माहिती, डीसीपी सीमा लाटकर यांनी माध्यमांना दिली आहे. याठिकाणी महिलांनीही मोठ्या प्रमाणात विरोध दर्शविण्यासाठी गर्दी केल्याने चन्नम्मा पथकाला पाचारण करण्यात आले आहे, असेही त्यांनी सांगितले.
अनधिकृतपणे पुतळा बसविल्याप्रकरणी कायद्यानुसार गुन्हा दाखल करण्यात येऊन पुढील निर्णय घेतला जाईल. घटनास्थळी वरिष्ठ पोलीस अधिकाऱ्यांसहित पोलीस बंदोबस्त तैनात करण्यात आला आहे, अशीही माहिती सीमा लाटकर यांनी दिली.