पुणे-बेंगळूर राष्ट्रीय महामार्गावरील मणगुत्ती क्रॉसजवळ सीईएन विभागाच्या अधिकाऱयांनी 6 लाख 22 हजार 300 रुपये किंमतीचे 173 बॉक्स गोवा बनावटीची दारु जप्त केली आहे. या प्रकरणी होनगा बेळगाव येथील एका युवकाला अटक करण्यात आली आहे.
पोलिसांनी दिलेल्या माहितीनुसार शकील कासीमसाब शेख (वय 34, रा. होनगा) असे अटक करण्यात आलेल्या युवकाचे नाव आहे. जिल्हा सीईएन विभागाचे पोलीस निरीक्षक विरेश दोडमनी, पी. एस. बजंत्री, ए. एच. बजंत्री, सहाय्यक पोलीस उपनिरीक्षक बी. एस. चिन्नीकुप्पी, एस. सी. अंबरशट्टी, व्ही. बी. नाईक, जी. एस. लमाणी, जीब चालक सुनील कांबळे आदींनी ही कारवाई केली आहे.
केए. 22 सी 9318 क्रमांकाच्या गुडस् कॅन्टरमधून गोवा बनावटीची दारु निपाणीकडे नेण्यात येत असल्याची माहिती मिळताच जिल्हा सीईएनच्या अधिकाऱयांनी जिल्हा पोलीस प्रमुख लक्ष्मण निंबरगी, अतिरिक्त जिल्हा पोलीस प्रमुख अमरनाथ रेड्डी यांच्या मार्गदर्शनाखाली मणगुत्ती क्रॉसजवळ कॅन्टर अडवून तपासणी केली.
या कॅन्टरमध्ये 750 एमएलच्या बाटल्यांनी भरलेले 173 बॉक्स (एका बॉक्समध्ये 12 बाटल्या) जप्त करण्यात आल्या आहेत. 2 हजार 76 लीटर, 750 एमएल इतका दारुसाठा पोलिसांनी ताब्यात घेतला आहे. या कारवाईची जिल्हा पोलीस प्रमुखाने कौतुक केले आहे.
