कर्नाटक राज्य आरोग्य आणि कुटुंब कल्याण खात्याच्या वैद्यकीय प्रसिद्धी पत्रकात मंगळवार दि. 3 जून 2020 रोजी सायंकाळी 5 वाजेपर्यंत बेळगाव जिल्ह्यात एकही कोरोना बाधित रुग्ण दाखविण्यात आलेला नसला तरी प्रत्यक्षात स्थानिक प्रसिद्धी पत्रकानुसार बेळगाव जिल्ह्यात नव्याने 12 रुग्ण आढळून आले असल्यामुळे एकूण कोरोनाबाधितांची संख्या आणखी वाढली आहे.
दरम्यान, राज्य आरोग्य आणि कुटुंबकल्याण खात्याच्या प्रसिद्धी पत्रकानुसार बेळगाव जिल्ह्यातील 7 रुग्णांना आज मंगळवारी डिस्चार्ज देण्यात आल्यामुळे जिल्ह्यातील हॉस्पिटलमधून डिस्चार्ज देण्यात आलेल्या रुग्णांची संख्या एकूण 126 इतकी झाली आहे. डिस्चार्ज देण्यात आलेल्या रुग्णांमध्ये ये पी -2260, 2261, 2262, 2263, 2264, 2266 आणि पी -2268 या क्रमांकाच्या रुग्णांचा समावेश आहे. यापैकी तीन पुरुष असून चार महिला आहेत.
बेळगाव जिल्हा आरोग्य आणि कुटुंब कल्याण खात्याच्या सर्व्हिलन्स युनिटने जाहीर केलेल्या वैद्यकीय प्रसिद्धी पत्रकानुसार मंगळवार दि. 3 जून 2020 रोजी सायंकाळी 5 वाजेपर्यंत कोरोनासंदर्भात बेळगाव जिल्ह्यात एकूण 14,516 संशयित व्यक्तींचे वैद्यकीय निरीक्षण करण्यात आले. 14 दिवसांसाठी होम काॅरन्टाईन केलेल्या जिल्ह्यातील व्यक्तींची संख्या 5,600 झाली असून हॉस्पिटलमध्ये आयसोलेशन करण्यात आलेल्या व्यक्तींची संख्या 97 आहे.
काॅरन्टाईन अर्थात विलगीकरणाचा 14 दिवसांचा कालावधी पूर्ण केलेल्या लोकांची संख्या 1,974 आहे, तर काॅरन्टाईनचा 28 दिवसांचा कालावधी पूर्ण केलेल्या व्यक्तींची संख्या 6,845 आहे. कोरोना विषाणू संसर्ग निदानासाठी एकूण 13,220 जणांचे स्वॅब नमुने घेण्यात आले होते. त्यापैकी 216 (1) नमुन्यांचा वैद्यकीय रिपोर्ट कोरोना पॉझिटिव्ह आला आहे. जिल्ह्याबाहेरील (बागलकोट) पॉझिटिव्ह रुग्ण 08 आहेत. प्रयोगशाळेत धाडलेल्या नमुन्यांपैकी 10,817 नमुने निगेटिव्ह असून ॲक्टिव्ह केसीस 97 आहेत. त्याचप्रमाणे 2,000 नमुन्यांचा अहवाल प्रलंबित आहे. आतापर्यंत जिल्ह्यातील एकाच रुग्णाचा मृत्यू झाला असून 126 रुग्ण कोरोना विषाणूच्या संसर्गापासून मुक्त अर्थात पूर्णपणे बरे झाले असून त्यांना हॉस्पिटलमधून डिस्चार्ज देण्यात आला आहे.
