शहरात बारावीच्या परीक्षेदरम्यान विद्यार्थी व पालकांनी ज्याप्रमाणे सोशल डिस्टंसिंगचे उल्लंघन केले, तसा प्रकार येत्या दहावीच्या अर्थात एसएसएलसी परीक्षेदरम्यान होऊ नये, यासाठी शिक्षण खाते व परीक्षा मंडळाने एक महत्त्वाचा व मोठा निर्णय घेतला आहे. या निर्णयानुसार एसएसएलसी परीक्षेच्या आदल्या दिवशी परीक्षेला कसे जावे, बैठक व्यवस्था कशी असेल आदींबाबत विद्यार्थ्यांना मार्गदर्शन करून रंगीत तालीम घेतली जाणार आहे. याखेरीज विद्यार्थ्यांचे माॅक टेस्टिंगहि केले जाणार आहे.
राज्यात नुकतीच बारावीची परीक्षा पार पडली. या परीक्षेदरम्यान बेळगावात विद्यार्थी व पालकांकडून कोरोना संदर्भातील सोशल डिस्टंसिंगसह अन्य नियमांचे साफ उल्लंघन झाले. हा प्रकार येत्या 25 जून पासून सुरू होणाऱ्या एसएसएलसी परीक्षेदरम्यान होऊ नये यासाठी परीक्षेच्या आदल्या दिवशी विद्यार्थ्यांनी गर्दी न करता सोशल डिस्टंसिंगसह अन्य नियमांचे पालन करून कशाप्रकारे परीक्षा द्यावी याचे प्रात्यक्षिक दाखवून रंगीत तालीम घेतली जाणार आहे. त्याचप्रमाणे एक दिवस आधी विद्यार्थ्यांचे मॉक टेस्टिंग देखील केले जाणार असल्याचे परीक्षा मंडळाने कळविले आहे. कोरोना प्रादुर्भावाच्या काळात रंगीत तालीम घेण्याचा अशाप्रकारचा हा प्रयोग पहिल्यांदाच होत आहे.
यंदाच्या 2019 -20 या शैक्षणिक वर्षातील इयत्ता दहावी अर्थात एसएसएलसीची परीक्षा कोरोनाच्या संकटामुळे लांबणीवर पडली होती. ही परीक्षा आता येत्या गुरुवार दि 25 जून ते गुरुवार दि 3 जुलै 2020 या कालावधीत घेतली जाणार आहे. राज्यातील 8.50 लाख विद्यार्थी – विद्यार्थिनी ही परीक्षा देणार आहेत. या परीक्षा दरम्यान कोरोनाचा प्रादुर्भाव टाळण्यासाठी वरीलप्रमाणे सोशल डिस्टंसिंग वगैरेची रंगीत तालीम आणि माॅक टेस्टिंगचा निर्णय घेण्यात आला आहे. या निर्णयामुळे परीक्षेच्या पहिल्या दिवशी विद्यार्थ्यांचा गोंधळ उडणार नसून त्यांना बऱ्यापैकी फायदा होणार आहे.
एसएसएलसी परीक्षा केंद्रांवरील आरोग्य तपासणी, थर्मल स्कॅनिंग, सॅनीटायझेशन, मास्कचे वितरण परीक्षा वर्गात कसा प्रवेश करावा आदींची प्रात्यक्षिकासह माहिती दिली जाणार आहे. यासाठी विद्यार्थ्यांना परीक्षेच्या आदल्या दिवशी नियोजित वेळी परीक्षा केंद्रावर हजर राहावयाचे आहे. शिक्षण खात्यातर्फे यासंदर्भातील सूचना सर्व शाळांना देण्यात येत आहेत.
दरम्यान, शहरातील शाळांमध्ये एसएसएलसी हॉल टिकीटचे वितरण सुरू झाले आहे. सोशल डिस्टंसिंगचे पालन करत विद्यार्थी-विद्यार्थिनींना हॉल तिकिटे दिली जात आहेत. एकंदर कोरोनाच्या विषारी विळख्यात एसएसएलसी परीक्षा सुरक्षित आणि सुरळीत (कोरोना मुक्त) पार पडावी यासाठी शिक्षण खात्यासह सरकारने जणू कंबरच कसली आहे.
