कोरोना व्हायरस अर्थात कोरोना विषाणूने आता भारतातही दहशत निर्माण केली असल्यामुळे दक्षता म्हणून देशविदेशातून येणाऱ्यांचे मुख्य ठिकाण असलेल्या सांबरा विमानतळावर बेळगाव जिल्हा आरोग्य खात्याने आपले जास्तीत जास्त लक्ष केंद्रित केले आहे. आज शुक्रवारपासून सांबरा विमानतळावर येणाऱ्या प्रत्येक प्रवाशाची काटेकोर वैद्यकीय चाचणी घेतली जात आहे. सदर चाचणीनंतरच संबंधित हवाईमार्गे प्रवास करून आलेल्या प्रवाशांना बेळगावात प्रवेश दिला जात आहे.
आता भारतातही प्राणघातक कोरोना विषाणूचा प्रसार होऊ लागला असून बेंगलोर, दिल्ली, हैदराबाद, जयपूर आदी ठिकाणी कोरोनाचे रुग्ण आढळून आले आहेत. पुणे, बेंगलोर, आणि हैदराबाद या शहरांसाठी बेळगाव हे मध्यवर्ती केंद्र असल्यामुळे बेळगावातही याबाबत दक्षता घेतली जात आहे. बेळगावच्या सिव्हिल हॉस्पिटलमध्ये यासाठी खास स्वतंत्र असा आयसोलेटेड विभागाची व्यवस्था करण्यात आली आहे.
“कोरोना”साठी आता सांबरा विमानतळावर एक डॉक्टर आणि दोन सहाय्यक असे आरोग्य पथक कार्यरत असून सांबरा विमानतळावर विमान उतरताच या आरोग्य पथकाकडून प्रत्येक प्रवाशाची काटेकोर वैद्यकीय तपासणी केली जात आहे. एखादा संशयित रुग्ण आढळल्यास त्याला तातडीने जिल्हा रुग्णालयात पाठविले जाणार आहे. त्याचप्रमाणे एका स्वतंत्र कक्षात रुग्णाची अधिक वैद्यकीय चाचणी केली जाणार आहे. सांबरा विमानतळावर काटेकोर वैद्यकीय तपासणी नंतरच परगांवाहून हवाईमार्गे प्रवास करून आलेल्या प्रवाशांना विमानतळाबाहेर जाऊ दिले जाणार आहे.
