कोरोना विषाणू प्रादुर्भावाचा पार्श्वभूमीवर देशात निर्माण झालेल्या आपत्कालीन परिस्थितीवर मात करण्यासाठी स्थापण्यात आलेल्या पंतप्रधान सहाय्यता निधीला बेळगावच्या कर्नाटक लॉ सोसायटीने 10 लाख रुपयांची मदत देऊ केली आहे.
जगभरात दहशत निर्माण करणाऱ्या कोरोना विषाणूंचा प्रादुर्भाव रोखण्यासाठी केंद्र सरकार युद्धपातळीवर उपाययोजना करत आहे. कोरोना विरुद्धच्या या लढाईसाठी मोठ्या प्रमाणात खर्च येणार असल्याने जनतेला पंतप्रधान सहाय्यता निधीला मदत करण्याचे आवाहन करण्यात आले आहे. खुद्द पंतप्रधान नरेंद्र मोदी यांनी कोरोना संदर्भात केलेल्या आवाहनाला प्रतिसाद देताना बेळगावच्या कर्नाटक लॉ सोसायटीच्या तातडीच्या बैठकीत पंतप्रधान सहाय्यता निधीला 10 लाख रुपयांची मदत करण्याचा निर्णय घेण्यात आला. सोसायटीचे अध्यक्ष अनंत मंडगी यांच्या अध्यक्षतेखाली झालेल्या या बैठकीस चेअरमन प्रदीप सावकार, सेक्रेटरी ॲड. विवेक कुलकर्णी, व्ही. एम. देशपांडे आदी उपस्थित होते.
बैठकीनंतर तात्काळ 5333783 क्रमांकाचा 10 लाख रुपयांचा धनादेश शहरातील केएलएस कॅम्पसमधील कॉर्पोरेशन बँकेमध्ये पंतप्रधान सहाय्यता निधीच्या नांवे दि. 31 मार्च 2020 रोजी जमा करण्यात आला आहे.
