अस्वलाच्या हल्ल्यात शेतकरी गंभीर जखमी झाला आहे शेतकऱ्यांवरील प्राणी हल्ल्याच्या घटनां वाढल्याने खानापूर तालुक्यातील शेतकऱ्यांमध्ये भीतीचे वातावरण पसरले आहे
शेताकडे गेलेल्या शेतकऱ्यावर जंगलातून आलेल्या अस्वलांनी अचानक हल्ला चढविल्याने नामदेव झिंगू पालकर वय 55 वर्षे हा डोंगरगाव ता खानापूर येथील शेतकरी गंभीर जखमी झाल्याची घटना आज सायंकाळी साडेचारच्या सुमारास घडली.
नामदेव पालकर व गावातील अन्य शेतकरी शेतातील कामे आटोपून सायंकाळी जंगलातील वाटेवरून घरी परत येत होते. जंगलाच्या मध्ये आले असताना अचानक तीन अस्वलानी नामदेव यांच्यावर हल्ला चढविला. नामदेव यांच्या पाठीचे व पायाचे अस्वलाने लचके तोडल्याने ते गंभीर जखमी झाले आहेत.
प्रतिकार करून थकल्याने नामदेव बेशुद्ध झाल्यानंतर अस्वलांनी जंगलात पळ काढला. अन्य शेतकऱ्यांनी नामदेव यांना लागलीच खानापूर सरकारी दवाखान्यात दाखल केले. तेथे प्रथमोपचार करून अतिरक्तस्त्राव झाल्याने त्यांना पुढील उपचारासाठी बेळगाव सरकारी दवाखान्यात हलविण्यात आले आहे. वनविभागाच्या कर्मचाऱ्यांनी घटनास्थळी धाव घेऊन वेळीच आवश्यक मदत पुरविली.
