नाल्यातून होणाऱ्या सांडपाण्यामुळे मार्कंडेय नदीत प्रदूषण होत आहे. हे रोखण्यासाठी विविध संघटना आणि संस्थांनी पुढाकार घेतला होता. यासाठी निवेदनही देण्यात आले होते. मात्र प्रत्यक्षात त्यासाठी प्रशासनाने कोणतेही पाऊल उचलले नाही. याचा फटका परिसरातील शेतकऱ्यांना बसला आहे.
यासाठी योग्य तो निधी देऊन सांडपाण्याचा वापर शेतीसाठी करण्याकडे लक्ष दिल्यास अनेकांना यांचा लाभ होणार आहे. मार्कंडेय नदी काठाच्या परिसरात हजारो एकर शेती ओलिताखाली आणली जाते. मात्र मागील काही वर्षापासून या नदीत सांडपाणी सोडण्यात येत असल्याने धोका निर्माण झाला आहे. याचा विचार प्रशासन करणार का? असा प्रश्न उपस्थित झाला आहे.
याचबरोबर नदीच्या काठी वनविभागाने अनेक रोपाची लागवड केली आहे. त्याचाही उपयोग व्हावयाचे असल्यास रोपट्याला शुद्ध पाण्याची आवश्यकता असते. मात्र रसायनमिश्रित पाणी असल्यामुळे अनेक झाडे नष्ट झाली आहेत. मार्कंडेय नदी ही उत्तर भागाला सुजलाम सुफलाम करणारी नदी आहे. काही वर्षांपासून सांडपाणी मिश्रित झाल्याने अनेक शेतकऱ्यांच्या समस्येत वाढ झाली आहे. ही समस्या सोडवण्यासाठी अनेक वेळा निवेदने देण्यात आली मात्र त्याचा काहीच उपयोग झाला नाही.
नदीच्या खोदाईसाठी उद्योग खात्रीतून कोट्यावधी रुपये खर्च करण्यात आले आहेत. हा निधी वाया गेल्याचे दिसून येत आहे. यासाठी प्रशासनाने पुढाकार घेण्याची गरज निर्माण झाली असून योग्य तो निधी देऊन पाणी शुद्धीकरण केल्यास अनेकांना याचा लाभ होणार आहे. मार्कंडेय नदीत हनुमाननगर, मार्कंडेयनगर, शाहूनगर, वैभवनगर, आझमनगर आदी भागातील सांडपाणी सोडण्यात येते. याचबरोबर खाजगी हॉस्पिटलमधील रासायनिक पाणीही नदीत सोडले जाते. यामुळे शेतीला मोठ्या प्रमाणात धोका निर्माण झाला आहे. पर्यावरणाचे संतुलन राखण्यासाठी कोट्यवधी झाडे लावणे गरजेचे असताना नदीकाठी लावण्यात आलेले झाडांचे अस्तित्व धोक्यात आले आहे. त्यामुळे यापुढे नदीत सोडले जाणारे सांडपाणी शुद्धीकरण केल्यास अनेकांना याचा लाभ होणार आहे. प्रशासन अथवा लोकप्रतिनिधींनी यासाठी पावले उचलण्याची गरज आहे
