बेळगाव लाईव्ह :अल्पवयीन मुलीवर अत्याचार केल्याप्रकरणी संतीबस्तवाड येथील एका युवकाला बेळगाव जिल्हा पोक्सो न्यायालयाच्या न्यायाधीश सी. एम. पुष्पलता यांनी 30 वर्षे सक्त मजुरीची शिक्षा आणि 10 हजार रुपयांचा दंड ठोठावला आहे.
शिक्षा ठोठावण्यात आलेल्या युवकाचे नांव नागराज होळ्याप्पा रंगी (वय 23, रा. शांती गल्ली, संतीबस्तवाड, ता.जि. बेळगाव) असे आहे.
नागराज याने एका अल्पवयीन मुली सोबत ओळख वाढवून तिच्याशी सलगी केली होती. त्याने 20 डिसेंबर 2022 रोजी त्या युवतीला आपल्या घरी बोलावून तिच्यावर अत्याचार केले. तसेच तिला जिवे मारण्याची धमकी देत तिच्याशी पुढे देखील अनैतिक संबंध ठेवले.
एवढे करून न थांबता 28 एप्रिल 2023 रोजी त्या अल्पवयीन युवतीचा रुग्णालयात नेऊन गर्भपात देखील केला. याप्रकरणी बेळगाव ग्रामीण पोलीस ठाण्यात पोक्सो अंतर्गत गुन्हा दाखल करण्यात आला होता.
तपास अधिकाऱ्यांनी या प्रकरणाची चौकशी करून अतिरिक्त जिल्हा आणि सत्र न्यायालय स्पेशल फास्टट्रॅक पॉक्सो न्यायालय -01 मध्ये दोषारोपपत्र दाखल केले होते. न्यायाधीश श्रीमती सीएम पुष्पलता यांनी काल गुरुवारी या खटल्याचा निकाल जाहीर करत पोलिसांनी केलेला तपास आणि साक्षी पुरावांच्या आधारे नागराज रंगी याला दोषी ठरवले.
तसेच त्याला 30 वर्षे सक्त मजुरीची शिक्षा व 10 हजार रुपये दंड ठोठावला आहे. याव्यतिरिक पीडित मुलीला जिल्हा कायदा प्राधिकरणाकडून 4 लाख रुपयांची भरपाई देण्याचे आदेश दिले आहेत. पीडीत युतीच्या नावे राष्ट्रीयकृत बँकेत ही रक्कम 5 वर्षासाठी ठेव स्वरूपात ठेवली जाणार आहे. या खटल्यात विशेष सरकारी वकील म्हणून ॲड. एल. व्ही. पाटील यांनी काम पाहिले.
