बेळगाव लाईव्ह :जिल्हा पंचायत बेळगाव – शिक्षण विभाग आणि शालेय शिक्षण उपसंचालक कार्यालय, बेळगाव यांच्या संयुक्त विद्यमाने आयोजित राज्यस्तरीय शालेय ज्युडो स्पर्धा बेळगाव येथे यशस्वीरित्या पार पडली.ही स्पर्धा 25 ते 27 ऑक्टोबर 2025 दरम्यान सिद्धारामेश्वर हायस्कूल हॉल, शिवबसव नगर, बेळगाव येथे पार पडली.
या तीन दिवसीय स्पर्धेत राज्यातील २५ हून अधिक जिल्ह्यांतील सुमारे ६०० मुलं-मुलींनी उत्साहपूर्ण सहभाग घेतला. 14 वर्षाखालील आणि 17 वर्षाखालील अशा दोन वयोगटांमध्ये झालेल्या स्पर्धांमध्ये खेळाडूंनी अप्रतिम कौशल्य, ताकद आणि क्रीडास्पर्धेचा उत्तम आविष्कार सादर केला.
स्पर्धेचे उद्घाटन शिक्षण विभागाचे अधिकारी, मान्यवर पाहुणे, शालेय प्रतिनिधी आणि ज्युडो प्रेमी यांच्या उपस्थितीत झाले. या स्पर्धेमुळे शालेय स्तरावरच्या खेळाडूंना आपले कौशल्य सादर करण्यासाठी आणि उच्च स्तरावरील स्पर्धांसाठी तयारी करण्याची उत्कृष्ट संधी मिळाली.
स्पर्धेदरम्यान अनेक जिल्ह्यांच्या खेळाडूंनी उल्लेखनीय कामगिरी केली. बेळगाव जिल्ह्याने 16 सुवर्ण, 3 रौप्य आणि 4 कांस्य पदकं जिंकत एकूण विजेतेपद पटकावले, तर चिकोडी संघाने 6 सुवर्ण, 9 रौप्य आणि 5 कांस्य पदकांसह उपविजेतेपद मिळवले.
प्रत्येक विभागातील पहिल्या क्रमांकाचे विजेते खेळाडू यावर्षी राजस्थान आणि मणिपूर येथे होणाऱ्या राष्ट्रीय शालेय ज्युडो स्पर्धांमध्ये कर्नाटक राज्याचे प्रतिनिधित्व करतील.
राज्यातील विविध जिल्ह्यांमधून आलेल्या सुमारे 20 पंच आणि अधिकाऱ्यांनी निष्पक्ष आणि सुरळीतरीत्या स्पर्धेचे संचालन केले. या स्पर्धेचे आयोजन राज्य पुरस्कार विजेते ज्युडो प्रशिक्षक सौ. कुतुजा मल्ताणी आणि कु. रोहिणी पाटील यांच्या मार्गदर्शनाखाली करण्यात आले. त्यांच्या नेतृत्वामुळे ही स्पर्धा शिस्तबद्ध आणि यशस्वीरीत्या पार पडली.
बेळगाव शिक्षण विभागाने सर्व सहभागी खेळाडू, प्रशिक्षक, अधिकारी, पालक आणि स्वयंसेवक यांचे सहकार्य आणि योगदानाबद्दल मनःपूर्वक आभार मानले.
समारोप कार्यक्रमात विजेत्या खेळाडूंना सन्मानचिन्ह देऊन गौरविण्यात आले आणि सर्वांच्या योगदानाबद्दल कृतज्ञता व्यक्त करण्यात आली.
