बेळगाव लाईव्ह :समुद्री खाद्याचा विषय जेंव्हा निघतो तेंव्हा खेकड्यांच्या मेजवानीचा उल्लेख टाळता येत नाही. पावसाळा सुरू झाला की खवय्यांना आठवण येते ती खेकड्याच्या रश्श्याची.
सध्या कॅम्प येथील फिश मार्केट जवळील चर्च शेजारील रस्त्यावर भरणाऱ्या बाजारात बेळगाव ग्रामीण भागासह घटप्रभा, गोकाक येथून खेकड्यांची आवक वाढू लागली आहे.
दरवर्षी पावसाळा सुरू झाला की कॅम्प येथील फिश मार्केट जवळील चर्च शेजारील रस्त्यावर खेकड्यांचा बाजार भरतो. येथे विक्री होणारे खेकडे हे समुद्रातील नसून नदीतून पकडलेले किंवा ग्रामीण भागातील आढे-नाल्या शेजारील जमिनीतून पकडून आणलेले असल्यामुळे त्यांच्यापासून निर्माण केलेल्या सुप, रस्सा, कालवण वगैरे खाद्यपदार्थांना आगळीच चव असते.
त्यामुळे खेकड्याच्या बाबतीत दर्दी असलेल्या खवय्यांना पावसाळा सुरू झाला की कॅम्प फिश मार्केट जवळील खेकड्यांचा बाजार केंव्हा भरतो? याची प्रतीक्षा लागून राहिलेली असते. या ठिकाणी बेळगाव ग्रामीण भागासह घटप्रभा, गोकाक, चंदगड वगैरे भागातून खेकड्यांची आवक होत असते. खेकड्यांचा हा बाजार श्रावण महिना सुरू होईपर्यंत तेजीत सुरू असतो.
यंदा पावसाळ्याच्या प्रारंभी म्हणावा तसा पाऊस झाला नसला तरी महाराष्ट्रात झालेल्या मुसळधार पावसामुळे घटप्रभा नदीच्या पातळीत वाढ झाली आहे. परिणामी या नदीकाठावरील रहिवाशी विशेष करून महिला पकडलेले खेकडे सकाळच्या रेल्वेने घटप्रभा येथून बेळगावला विक्रीसाठी आणत आहेत.
बेळगाव ग्रामीण भागातील खेकडे देखील विक्रीसाठी फिश मार्केट जवळील बाजारात दाखल होत असून चंदगड तालुक्यातील ताम्रपर्णी नदीच्या खेकड्यांना बेळगावात विशेष मागणी आहे. गेल्या कांही दिवसांपासून कॅम्प फिश मार्केट जवळील खेकड्यांच्या बाजारात आवक सुरू झाली असून आकारानुसार खेकड्यांचा दर ठरवला जात आहे.
सध्या या खेकड्यांच्या बाजारात मध्यम जोडी 100 ते 120 रुपये आणि लहान जोडी 60 ते 80 रुपये असा दर सुरू आहे. सध्या या खेकड्यांच्या बाजारात मध्यम जोडी 120 रुपये आणि लहान जोडी 60 ते 80 रुपये असा दर सुरू आहे. हा दर सर्वसामान्यांसाठी जास्त असला तरी खरेदीसाठी खवय्यांची गर्दी होताना पहावयास मिळत आहे.
