बेळगाव लाईव्ह : विज्ञान शाखेतील पदवी घेत कोणती नोकरी न करता आर्थिक स्त्रोत्र निर्माण करणारी शेती करत शासनाचा कृषी पंडित पुरस्कार मिळवण्याचे काम बेळगाव जिल्ह्यातील निपाणी जवळील संजय शिंत्रे यांनी केले आहे.
कर्नाटक सरकारचा कृषी खाते कडून देण्यात येणारा मानाचा “कृषी पंडित” पुरस्कार शेतीमध्ये विविध प्रयोग करीत आर्थिक स्तोत्र निर्माण करणारी शेती करणारे, प्रगतिशील शेतकरी संजय चंद्रशेखर शिंत्रे यांना जाहीर झाला आहे त्यांनी सौंदलग्याच्या शिर पेचात मानाचा तुरा रोवला गेला आहे.
शिंत्रे यांनी यापूर्वी बागवानी खात्याकडून प्रगतिशील शेतकरी व आत्मा विभागाकडून श्रेष्ठ कृषक असे पुरस्कार मिळाले आहेत.त्यांनी विज्ञान शाखेतील पदवी पूर्ण केल्यानंतर नोकरीच्या मागे न लागता वडिलार्जीत शेती करत आर्थिक स्तोत्र निर्माण करणारी शेती करू लागले.
ही शेती करीत असताना पारंपरिक शेतीला फाटा देत फुल शेती करून युवकापुढे शेती सुधारण्याचा पाया रोवत त्यांनाही मार्गदर्शन केले. फुल शेती बरोबरच आंबा, पाम आदी आर्थिक उत्पादन देणाऱ्या फळ शेतीकडे लक्ष दिले.हे करीत असताना चार लोकांना रोजगारही मिळावा हा उद्देश ठेवत आपल्या नऊ एकर क्षेत्रात आमराई कृषी पर्यटन केंद्र निर्माण करून तेथे शहरातील नागरिकांना नैसर्गिक वातावरणाचा आनंद देत. बोटिंग झुलता पूल, धबधबे, बैलगाडी पर्यटन आदी गोष्टी निर्माण केल्या.
दिवसभर पर्यटकांना या नैसर्गिक वातावरणाचा, विविध पक्षांचा आनंद घेत असताना विसावा घेत त्यांच्या दुपारी व रात्रीच्या शुद्ध शाकाहारी सात्विक आहाराची, तसेच नाश्त्याची सोय केली. त्यांना शेतीतील विविध प्रयोग दाखवत नैसर्गिक गोष्टींचा आनंद मिळवून दिला. आपल्या आमराईतील सेंद्रिय आंबे बेंगलोर येथे प्रदर्शनात तसेच मार्केटमध्ये पाठवून बाजारपेठ निर्माण केली.
शेतीत विविध प्रकारचे प्रयोग करत असल्याचे पाहून त्यांना कर्नाटक सरकारच्या कृषी ईलाखे खात्याकडून कृषी पंडित हा पुरस्कार जाहीर झाला असून या पुरस्कारा बरोबरच सन्मान पदक व रोख रक्कम बक्षीस जाहीर झाली असून त्यांना लवकरच शासनाच्या वतीने पुरस्कार देण्यात येणार आहे. पुरस्कारामुळे भागातील शेतकरी वर्गाकडून तसेच सौंदलगा येथील नागरिकांकडून त्यांच्ये अभिनंदन होत आहे.
या पुरस्काराविषयी बोलताना संजय शिंत्रे म्हणाले की, शेतीची मला पहिल्यापासूनच आवड होती. त्यातूनच मी शेतीमध्ये विविध प्रयोग करण्यास सुरुवात केली. यासाठी मला बागवानी ईलाखे चिकोडी. कृषी खाते निपाणी. कृषी विज्ञान केंद्र तुकानहट्टी येथील अधिकारी वर्गाचे मोलाचे सहकार्य लाभले आहे.