बेळगाव लाईव्ह :सालाबाद प्रमाणे कणकुंबी (ता. खानापूर, जि. बेळगाव) येथील पारंपरिक श्री माऊली देवी शिमगोत्सवाला काल गुरुवारपासून अमाप उत्साहात भक्तीभावाने प्रारंभ झाला असून समस्त गावाचा सहभाग असणारा हा उत्सव येत्या गुरुवार दि. 20 मार्च 2025 पर्यंत साजरा केला जाणार आहे.
कणकुंबी येथील श्री माऊली देवी शिमगोत्सवाच्या कालच्या शुभारंभाच्या दिवशी दुपारी 12 वाजता होळीचे गाऱ्हाणे घालण्याचा कार्यक्रम झाल्यानंतर होळी आणण्यासाठी गावकऱ्यांनी जंगलात प्रस्थान केले.
त्यानंतर श्री माऊली देवीच्या पालखीचे रात्री 8 वाजता वाजत गाजत देवीच्या मंदिराकडून चव्हाट्या मंदिराकडे आगमन व स्थापनेचा कार्यक्रम पार पडला. आज शुक्रवारी दुसऱ्या दिवशी सकाळी जंगलातून आणलेल्या होळीचे गावाच्या वेशीतून चव्हाटा मंदिराकडे वाजत गाजत आगमन झाले. उत्तुंग अशी अवजड होळी ढकलत आणणारे जवळपास 100 गावकरी साऱ्यांचे लक्ष वेधून घेत होते. त्यानंतर दुपारी 12 वाजता होळीचे गाऱ्हाणे व होळी उभारणे, वेशीतील होळी उभारणे आणि बाजार गल्ली येथील होळी पेटवणे हे कार्यक्रम समस्त गावकऱ्यांच्या उपस्थितीत भक्तिभावाने पार पडले.
आता आज सायंकाळी 6 ते रात्री 8 वाजेपर्यंत बाजार गल्ली भजनी मंडळाचा बाजारातील होळी कामन्नाकडून चव्हाटा होळीला भेट देण्याचा कार्यक्रम होणार असून रात्री 10 वाजता ‘चोर’ हा पारंपारिक कार्यक्रम पार पडेल.
कणकुंबी येथे साजरा होत असलेल्या श्री माऊली देवी शिमगोत्सवात विविध कार्यक्रमांची रेलचेल आहे. उद्या शनिवारी 15 मार्च रोजी मंडप सजावट व देवीचे होड, निशाणी, अब्दागिरी, यांची घरोघरी अंगणात पूजा, सकाळी 11 वाजता चव्हाटा मंदिरात श्री सत्यनारायण पूजा, आरती, तीर्थप्रसाद आणि रात्री 9:30 वाजता ‘रणमाले’ हे नाटक, तर 11 वाजता ‘आवय तिरंगी मम्मी फिरंगी’ हे कोंकणी विनोदी नाटक असे कार्यक्रम होणार आहेत.
याच पद्धतीचे विविध धार्मिक, शैक्षणिक व मनोरंजनात्मक कार्यक्रम पुढील पाच दिवसात म्हणजे गुरुवार दि. 20 मार्च 2025 पर्यंत होणार आहेत. या शेवटच्या दिवशी श्री माऊली देवीच्या पालखीचे चव्हाटा मंदिरकडून श्री माऊली देवी मंदिराकडे वाजत गाजत प्रस्थान आणि तुळाभराच्या कार्यक्रमाने उत्सवाची सांगता होणार आहे.
