बेळगाव लाईव्ह :रस्ता ओलांडताना टँकर खाली सापडल्याने घडलेल्या अपघातात एका वृद्धेचे दोन्ही पाय निकामी झाल्याची घटना आज सकाळी खानापूर रोडवरील गोवावेस सर्कल येथे घडली.
अपघातात पाणी कमी होऊन गंभीर जखमी झालेल्या वृद्ध महिलेचे नांव सुरैया सय्यद (वय 79, रा. मुस्लिम गल्ली अनगोळ) असे आहे.
खानापूर रोडवरील गोवावेस सर्कल येथे सदर महिला आज गुरुवारी सकाळी दहा वाजण्याच्या सुमारास रस्ता ओलांडत असताना समोरून येणाऱ्या भारत पेट्रोलियमच्या टँकर (क्र. केए 22 बी 1695) खाली सापडली. या अपघातात सुरैया यांचे दोन्ही पाय टँकरच्या चाकाखाली सापडून निकामी झाले.
अपघात घडताच आसपासचे लोक मदतीला धावले. त्यांनी गुडघ्यापासून निकामी झालेल्या पायांसह रक्ताच्या थारोळ्यात पडलेल्या सूरैया यांना आधार देत उठून बसवले. दरम्यान चौकात उपस्थित रहदारी पोलिसांनी 108 रुग्णवाहिकेला बोलावून जखमी सुरैया यांना तातडीने सिव्हिल हॉस्पिटलमध्ये हलविले.
अपघात घडताच बघ्याची एकच गर्दी झाली होती. तसेच रक्ताच्या थारोळ्यात चुराडा झालेल्या पायांसह रस्त्यावर असहाय्य अवस्थेत पडलेल्या वृद्ध सुरैय्या यांना पाहून सर्वांमध्ये हळहळ व्यक्त होत होती. सदर अपघाताची रहदारी दक्षिण पोलीस ठाण्यात नोंद झाली आहे.
