बेळगाव शहरातील गो गो स्पोर्ट्स आयोजित ‘गो गो स्पोर्ट्स करंडक -2022’ मर्यादित षटकांच्या आंतर प्रभाग टेनिसबॉल क्रिकेट स्पर्धेचे अजिंक्यपद प्रभाग क्र. 4 च्या क्रिकेट लव्हर्स संघाने पटकाविले. प्रभाग क्र. 58 च्या मजगाव संघाला उपविजेतेपदावर समाधान मानावे लागेल.
महाद्वार रोड येथील छ. संभाजी उद्यानामध्ये सदर भव्य टेनिस बॉल क्रिकेट स्पर्धा काल सोमवारी यशस्वीरित्या पार पडली. स्पर्धेच्या अंतिम सामन्यात क्रिकेट लव्हर्स संघाने प्रतिस्पर्धी मजगाव संघावर 8 धावांनी विजय मिळविला.
नाणेफेक जिंकून प्रथम फलंदाजी करताना क्रिकेट लव्हर्स संघाने मर्यादित 10 षटकात 4 गडी बाद 75 धावा काढल्या. प्रत्युत्तरादाखल मजगाव संघाला मर्यादित 10 षटकात 6 गडी बाद 68 धावा काढता आल्या. अंतिम सामन्यातील सामनावीर पुरस्काराचा मानकरी रोहित पाटील हा ठरला.
अंतिम सामन्यानंतर आयोजित बक्षीस वितरण समारंभात प्रमुख पाहुणे म्हणून बेळगाव उत्तरचे आमदार ॲड. अनिल बेनके, राहुल मुचंडी, नगरसेविका वैशाली भातकांडे, विजय चौगुले, वसंत सोनलकर, सम्राट पाटील, जितेंद्र घसारी, सुदर्शन, प्रणय शेट्टी आणि प्रताप जुवेकर उपस्थित होते. या मान्यवरांच्या हस्ते विजेत्या आणि उपविजेत्या संघांना आकर्षक करंडकासह रोख रकमेच्या पारितोषिकाने गौरविण्यात आले. प्रथम क्रमांकाचे पारितोषिक आमदार ॲड. अनिल बेनके यांनी तर द्वितीय क्रमांकाचे पारितोषिक सामाजिक कार्यकर्ते बाळकृष्ण तोपिनकट्टी यांनी पुरस्कृत केले होते. त्याचप्रमाणे करंडक प्रताप जुवेकर यांनी पुरस्कृत केले होते.
स्पर्धेतील वैयक्तिक पारितोषिकाचे मानकरी पुढील प्रमाणे आहेत. मालिकावीर -रोहित पाटील, उत्कृष्ट फलंदाज -विशाल गोरगोंडा, उत्कृष्ट गोलंदाज -सुधीर उपाध्ये, अंतिम सामन्यातील सामनावीर -रोहित पाटील, उत्कृष्ट झेल -विकी मंडोळकर, उत्कृष्ट संघ -सन शाईन (प्रभाग क्र. 15), उत्कृष्ट यष्टीरक्षक -अलोक बडगावी.
सदर स्पर्धा यशस्वी करण्यासाठी गो गो स्पोर्ट्सच्या पदाधिकारी आणि सदस्यांनी विशेष परिश्रम घेतले. त्यांना पुरस्कर्ते आमदार ॲड. अनिल बेनके, बाळकृष्ण तोपिनकट्टी, प्रताप जुवेकर, किरण जाधव, संजय कडोलकर, महेश राजाराम पाटील, सम्राट पाटील, संजय पाटील, वसंत सोनवलकर, श्रीमान सालगुडे, मोहन जुवेकर, विजय चौगुले, राहुल मुचंडी, प्रणय शेट्टी, राजेश लोहार, ऋतुराज चौगुले, सुनील बुलबुले, अमर सरदेसाई आणि जयंत जाधव यांचे सहकार्य लाभले.
