‘ओमिक्राॅन’ या कोरोनाच्या नव्या व्हेरीएंटच्या संसर्गाची भीती वाढल्याने राज्य सरकारचे बेळगावातील हिवाळी अधिवेशन अनिश्चिततेच्या भोवर्यात सापडले आहे. अधिवेशन घ्यायचे कि नाही? हे पुढील आठवड्यातील कोरोना परिस्थितीवर अवलंबून राहणार आहे.
राज्याचे हिवाळी अधिवेशन येत्या 13 ते 24 डिसेंबर दरम्यान बेळगाव सुवर्ण विधानसौध येथे घेण्याचे आधीच ठरले असून त्याची तयारी देखील सुरू झाली आहे. ओमिक्राॅन या कोरोनाच्या व्हेरिएंटच्या प्रादुर्भावामुळे जगभरात पुन्हा जबरदस्त भीती पसरली आहे.
गेल्या शनिवारी मुख्यमंत्री बसवराज बोम्मई यांच्या अध्यक्षतेखाली झालेल्या उच्चस्तरीय बैठकीत महाराष्ट्र आणि केरळ सीमांवर सतर्क राहण्याचा आदेश बजावण्यात आला आहे.
बेळगाव हे महाराष्ट्राच्या सीमेवर असल्याने येथे अधिवेशन घेण्यावरून मतभेद निर्माण झाले आहेत. खरेतर मुख्यमंत्री बोम्मई आणि विधानसभेचे सभापती बसवराज होरट्टी हे उत्तर कर्नाटकातील असल्याने हे उभयता बेळगावात अधिवेशन घेण्यास उत्सुक आहेत.
तथापी पुढील आठवड्यात कोरोना संसर्गात वाढ न झाल्यास अधिवेशन बेळगावात आयोजित केले जाईल, अन्यथा ते पुढे ढकलण्याचा किंवा बेंगळूर येथेच घेण्याचा निर्णय घेता जाऊ शकतो.
