बेळगाव शहरातील प्रसिद्ध बँड बसवणी चे मालक मोहन बागेवाडी यांच्या घरात चोरी केलेल्या चोरट्याना पकडण्यात मार्केट पोलिसांना यश आले आहे.या प्रकरणी पोलिसांनी तिघा युवकांना अटक करून त्यांच्या जवळील दागिने जप्त केले आहेत.
गेल्या अकरा नोव्हेंबर रोजी मठ गल्ली येथील मोहन बागेवाडी यांच्या घरात कुणी नसलेलं पाहून रात्रीच्या वेळी कुलूप तोडून प्रवेश करून दागिने लंपास केले होते.घरचा दरवाजा फोडताना तिघे जण काही प्रमाणात सी सी टी व्ही फुटेज मध्ये देखील अडकले होते त्यावरून पोलिसांनी तपासाची चक्रे फिरवून तीन घरफोडी करणाऱ्या चोरट्यांना गजाआड केलं आहे.
सलमान मेहमूदअर्षद दलायत,इस्माईल इब्राहिम नायकवाडी,तन्वीर मेहबूब देशनूर रा.कलईगार गल्ली फोर्ट रोड अशी या चोरट्यांची नावे आहेत.
मार्केट पोलीस निरीक्षक विजय मुरगुंडी यांच्या नेतृत्वात पोलिसांनी कारवाई करत त्यांच्या जवळील 58 ग्राम दागिने जप्त केले आहेत.दीड महिन्यात या प्रकरणाचा छडा पोलिसांनी लावला आहे.
