बेळगाव लाईव्ह : बेळगाव सायबर क्राईम पोलिसांनी मोठ्या प्रमाणावर सुरू असलेल्या आंतरराज्यीय सायबर फसवणूक रॅकेटचा पर्दाफाश करत दोन मुख्य आरोपींना अटक केली आहे.
“वर्क फ्रॉम होम” नोकऱ्या आणि सरकारी कर्ज योजनांच्या आमिषाने नागरिकांची कोट्यवधी रुपयांची फसवणूक केल्याचा आरोप या टोळीवर आहे.
या प्रकरणात मेघा म्हारदोळकर (रा. बेळगाव) हिला गोव्यातून अटक करण्यात आली असून हैदर अली गुलाम अली उज्जैनवाला (वय ६७) याला मुंबईत अटक करण्यात आली आहे.
कसा उघड झाला घोटाळा?
फेब्रुवारी अखेरीस मानसी नावाच्या स्थानिक महिलेने दिलेल्या तक्रारीनंतर हा प्रकार उघडकीस आला. आरोपी मेघा ही नागरिकांशी ओळख वाढवून त्यांना घरबसल्या नोकरी व सरकारी कर्ज मिळवून देण्याचे आमिष दाखवत असे. त्यानंतर ती त्यांच्या वैयक्तिक कागदपत्रांचा गैरवापर करून त्यांच्या नावावर बँक खाती उघडत असे.
ही खाती “म्युल अकाउंट्स” म्हणून वापरली जात असून त्याद्वारे फसवणुकीतून मिळालेली रक्कम वळवली जात होती. मेघाच्या घरावर छापा टाकला असता विविध नागरिकांच्या नावावर उघडलेली तब्बल ७२ बँक खाती आढळून आली.
मुंबई कनेक्शन
तपासात उघड झाले की, मेघा ही बँक किट्स आणि पासबुक्स मुंबईतील हैदरअली याच्याकडे पाठवत असे. हैदरअली, त्याचा मुलगा तसेच इद्रिस अली, अझीझ बोरा आणि मेघाची मुलगी शिवानी यांच्यासह इतर साथीदार या पैशांची पुढील देवाणघेवाण करत होते.
मोठा आर्थिक फटका
• एकूण फसवणूक रक्कम : ₹१.२७ कोटींहून अधिक
• जप्त खात्यांपैकी ४७ खाती National Cyber Crime Reporting Portal वरील १४४ तक्रारींशी संबंधित
•
पोलिसांचे कौतुक
ही कारवाई एसीपी बी. एस. मंतुरा आणि निरीक्षक एस. एन. गाबी यांच्या नेतृत्वाखाली, पोलीस आयुक्तांच्या मार्गदर्शनाखाली पार पडली. या उत्कृष्ट कामगिरीबद्दल पोलीस आयुक्तांनी पथकाचे कौतुक केले आहे.
दोन्ही आरोपी सध्या न्यायालयीन कोठडीत असून इतर फरार आरोपींचा शोध सुरू आहे.
नागरिकांसाठी आवाहन
पोलीसांनी नागरिकांना सतर्क राहण्याचे आवाहन केले असून “हमखास नोकरी” किंवा “सरकारी कर्ज” देण्याचे आमिष दाखवणाऱ्यांवर विश्वास ठेवू नये, तसेच कोणालाही आपली वैयक्तिक कागदपत्रे देऊ नयेत, असे सांगितले आहे.
