बेळगाव लाईव्ह :बेळगाव शहरातील वाढती वाहतूक कोंडी, अपघातांचे प्रमाण आणि नागरिकांच्या सुरक्षिततेच्या पार्श्वभूमीवर बेळगाव पोलीस आयुक्तालयाने खासगी लांब पल्ल्याच्या बस तसेच अवजड वाहनांच्या हालचालींवर कडक निर्बंध लागू केले आहेत.
नो-पार्किंग व एकाआड एक पार्किंग नियम
शहरातील वाहतूक सुरळीत ठेवण्यासाठी पुढील रस्त्यांवर दोन्ही बाजूंनी वाहन पार्किंग बंद (नो-पार्किंग) करण्यात आले आहे –
• त्रिवेणी हॉटेल ते सीबीएस (Central Bus Stand) सर्कल
• कीर्ती हॉटेल क्रॉस ते संगोळी रायन्ना (RTO) सर्कल
तसेच,
कृष्णदेवराय (कोल्हापूर) सर्कल ते महापालिका क्रॉस दरम्यान वाहतूक सुरळीत राहावी म्हणून सम-विषम (Even-Odd) तारखेनुसार एकाआड एक बाजूला पार्किंग करण्याचा नियम लागू करण्यात आला आहे.
या नियमांचे उल्लंघन करणाऱ्यांवर मोटार वाहन कायदा कलम 190(2) अंतर्गत कारवाई केली जाणार आहे.
अवजड वाहनांना ठराविक वेळेत शहरात प्रवेश बंद
शहरातील शाळा, महाविद्यालये व कार्यालयांच्या वेळेत अपघात टाळण्यासाठी अवजड वाहनांच्या प्रवेशावर पुढील वेळेत बंदी घालण्यात आली आहे –
🕖 सकाळी 7 ते 11
🕒 दुपारी 3 ते रात्री 8
या वेळेत शहरात कोणतेही अवजड वाहन प्रवेश करू शकणार नाही.
नियम मोडणाऱ्यांवर मोटार वाहन कायदा कलम 177 अंतर्गत कारवाई होणार आहे.
2025 मध्ये नो-एंट्री नियमाचे उल्लंघन केल्याप्रकरणी 1001 गुन्हे दाखल करून ₹4,17,050 दंड वसूल करण्यात आला आहे.
खासगी बससाठी पिक-अप व ड्रॉपचे तीन निश्चित ठिकाणे
शहरातील वाहतूक कोंडी टाळण्यासाठी खासगी लांब पल्ल्याच्या बसांना आता शहरात कुठेही प्रवासी चढवण्यास किंवा उतरवण्यास मनाई करण्यात आली आहे.
🗓️ दिनांक 27 जानेवारी 2026 पासून
खासगी बस फक्त खालील तीन ठिकाणांवरूनच पिक-अप व ड्रॉप करणार —
1️⃣ भरतेश स्कूल – पे पार्किंग
2️⃣ अशोकनगर, Belagavi One केंद्रामागील मोकळी जागा – पे पार्किंग
3️⃣ धर्मनाथ सर्कल ते अशोकनगर रोड
त्रिवेणी हॉटेल, आरटीओ सर्कल, रामदेव हॉटेल, धर्मवीर संभाजी चौक आदी ठिकाणी बस थांबवून प्रवासी घेणे पूर्णतः बंद राहील.
कठोर कारवाईचा इशारा
या आदेशांचे उल्लंघन करणाऱ्या बस चालक, मालक व अवजड वाहन चालकांवर मोटार वाहन कायद्यानुसार कठोर कारवाई केली जाणार असल्याचा इशारा देण्यात आला आहे.
बेळगाव शहर पोलीस आयुक्तांनी नागरिक, बस चालक व वाहनचालकांना या नियमांचे पालन करून वाहतूक सुरळीत ठेवण्यासाठी सहकार्य करण्याचे आवाहन केले आहे.
