बेळगाव लाईव्ह :मुख्यमंत्री सुवर्ण पदक विजेते गदग जिल्हा अग्निशामक अधिकारी बेळगावचे व्यंकटेश सिद्धाप्पा टक्केकर यांचा सेवानिवृत्तीपर भव्य सत्कार समारंभ आज बुधवारी गदग येथे उत्साहात पार पडला.
कर्नाटक राज्य अग्निशामक आणि आपत्कालीन सेवा अग्निशामक ठाणे, गदग यांच्यातर्फे या सत्कार समारंभाचे आयोजन करण्यात आले होते. याप्रसंगी उपस्थित वरिष्ठ अग्निशामक अधिकाऱ्यांच्या हस्ते सेवानिवृत्त होत असलेले जिल्हा अग्निशामक अधिकारी व्यंकटेश टक्केकर यांचा यथोचित सत्कार करण्यात आला. मूळचे कलखांब (ता. जि. बेळगाव) येथील रहिवासी आणि सध्या रामतीर्थनगर, बेळगाव येथे वास्तव्यास असलेले व्यंकटेश टक्केकर हे अग्निशामक दलात 34 वर्षे सेवा बजावून आज बुधवारी 31 डिसेंबर 2025 रोजी सेवानिवृत्त झाले आहेत. आपली सेवा निष्ठापूर्वक प्रामाणिकपणे करणारे टक्केकर हे एक कर्तव्यदक्ष अधिकारी म्हणून सुपरिचित आहेत.
घरच्या हलाखीच्या परिस्थितीमुळे शिक्षण अपुरे झालेले व्यंकटेश टक्केकर जिद्द आणि चिकाटीच्या जोरावर 1991 मध्ये कर्नाटक राज्य अग्निशमन दलात भरती झाले. त्यावेळी प्रशिक्षण घेत असताना आपण देखील आपल्या प्रशिक्षकांप्रमाणे प्रशिक्षक बनायचे असा निश्चय टक्केकर यांनी केला. त्यासाठी यशवंतराव चव्हाण मुक्त विद्यापीठातून 2012 मध्ये ते पदवीधर झाले. त्यानंतर अग्निशमन दलातील परीक्षा उत्तीर्ण देखील झाले. बेळगाव येथून आपल्या सेवेला सुरुवात करणाऱ्या व्यंकटेश टक्के कर यांनी त्यानंतर बैलहोंगल, संकेश्वर, सदलगा, बळ्ळारी, सौंदत्ती व रामदुर्ग येथे सेवा बजावली. त्यावेळी ते फायरमन, लीडिंग फायरमन म्हणून कार्य करत होते.
कर्तव्य दक्षतेमुळे वरिष्ठ अधिकाऱ्यांच्या विश्वासास पात्र ठरलेले टक्केकर कारकिर्दीतील प्रामाणिक सेवा आणि कार्यतत्परतेमुळे गदग जिल्हा अग्निशामक अधिकारी या वरिष्ठ पदावर पोहोचले. दरम्यानच्या कालावधीत 2021 मध्ये कर्नाटक सरकारकडून त्यांना मुख्यमंत्री सुवर्ण पदकाने सन्मानित करण्यात आले. याव्यतिरिक्त व्यंकटेश टक्केकर यांना त्यांच्या उल्लेखनीय कार्याबद्दल विविध स्थानिक पुरस्कार प्राप्त झाले आहेत.
बुधवारी गदग येथे या निमित्ताने त्यांचा सत्कार करण्यात आला यावेळी माजी जिल्हा पंचायत सदस्या सरस्वती पाटील यांनी त्यांना शुभेच्छा दिल्या.
शून्यातून विश्व निर्माण करणारा एक ‘अग्निपुत्र’: जिल्हा अग्निशामक अधिकारी व्यंकटेश टक्केकर यांची ३४ वर्षांची सेवागाथा
संकटाच्या काळात जेव्हा सर्वजण जीव वाचवून सुरक्षित स्थळाकडे धावतात, तेव्हा आगीच्या ज्वाळांशी दोन हात करण्यासाठी धावून जाणारा एक खाकी वर्दीतला देवदूत म्हणजे अग्निशामक. अशाच एका ध्येयवेड्या आणि अत्यंत प्रामाणिक अधिकाऱ्याचा ३४ वर्षांचा सेवाप्रवास आज पूर्ण होत आहे. बेळगावचे सुपुत्र आणि सध्या गदग येथे जिल्हा अग्निशामक अधिकारी म्हणून कार्यरत असलेले श्री. व्यंकटेश सिद्धाप्पा टक्केकर हे दि. ३१ डिसेंबर २०२५ रोजी आपल्या प्रदीर्घ सेवेतून निवृत्त होत आहेत. त्यांचा हा प्रवास केवळ एका सरकारी नोकरीचा नसून, तो जिद्द, चिकाटी आणि संघर्षाचा एक ज्वलंत आदर्श आहे.
मूळचे कलखांब येथील रहिवासी असलेल्या व्यंकटेश टक्केकर यांचा जन्म ११ डिसेंबर १९६५ रोजी एका अत्यंत सामान्य कुटुंबात झाला. कै. सिद्धाप्पा आणि कै. लक्ष्मी टक्केकर या माता-पित्यांच्या पोटी जन्मलेल्या व्यंकटेश यांचे प्राथमिक शिक्षण कलखांब आणि माध्यमिक शिक्षण कणबर्गी येथील मराठी शाळेत झाले. मात्र, घरची परिस्थिती अत्यंत हलाखीची असल्याने त्यांना आपले शिक्षण थांबवावे लागले. आई-वडील आणि तीन बहिणींची जबाबदारी अवघ्या १४ व्या वर्षी त्यांच्या खांद्यावर आली. मात्र खचून न जाता त्यांनी मिळेल ते काम आनंदाने स्वीकारले. कधी घरांना रंग देण्याचे पेंटिंगचे काम केले, कधी सुतारकाम केले, तर कधी उद्यमबाग येथील लेथ मशिनवर घाम गाळला. या संघर्षाच्या काळातच त्यांच्यातील कष्टाळू वृत्ती तावून सुलाखून निघाली.
१९८६ मध्ये निर्मला (लक्ष्मी) यांच्याशी त्यांचा विवाह झाला आणि संसाराची नवी जबाबदारी सुरू झाली. आयुष्याला खऱ्या अर्थाने कलाटणी मिळाली ती १९९१ मध्ये, जेव्हा ते कर्नाटक राज्य अग्निशमन दलात भरती झाले. प्रशिक्षणादरम्यान आपल्या वरिष्ठांना पाहून “आपणही एक दिवस अधिकारी बनायचे” हे स्वप्न त्यांनी उराशी बाळगले. शिक्षण सुटलेले असूनही जिद्द कायम होती. त्यांनी यशवंतराव चव्हाण मुक्त विद्यापीठातून २०१२ साली पदवी संपादन केली आणि खात्यांतर्गत परीक्षा देऊन अधिकारी पद खेचून आणले.
आपल्या ३४ वर्षांच्या सेवेत त्यांनी बेळगाव, बैलहोंगल, संकेश्वर, सदलगा, बळ्ळारी, सौंदत्ती आणि रामदुर्ग अशा विविध ठिकाणी आपली सेवा बजावली. फायरमनपासून सुरू झालेला हा प्रवास त्यांच्या प्रामाणिकपणामुळे जिल्हा अग्निशामक अधिकारी या सर्वोच्च पदापर्यंत पोहोचला. त्यांच्या याच अतुलनीय सेवेची आणि धैर्याची दखल घेत २०२१ साली त्यांना मानाच्या ‘मुख्यमंत्री सुवर्णपदकाने’ सन्मानित करण्यात आले. अनेक आणीबाणीच्या प्रसंगात त्यांनी दाखवलेली समयसूचकता आणि वरिष्ठांचा त्यांच्यावर असलेला गाढा विश्वास हीच त्यांच्या आयुष्याची मोठी कमाई ठरली.
आज ते निवृत्त होत असताना त्यांचे कुटुंब आणि मुले सुहास, कविता व मंजुनाथ यांना त्यांच्या कर्तृत्वाचा सार्थ अभिमान वाटत आहे. हलाखीच्या परिस्थितीतून वर येऊन आपल्या मुलांना उच्च शिक्षण देणारे आणि समाजासमोर एक आदर्श ठेवणारे व्यंकटेश टक्केकर आता आपल्या रामतिर्थनगर, बेळगाव येथील निवासस्थानी आयुष्याच्या दुसऱ्या पर्वाला सुरुवात करत आहेत. आगीशी खेळणाऱ्या या योद्ध्याने आपल्या कर्तव्याची ज्योत सदैव तेवत ठेवली, हेच त्यांच्या व्यक्तिमत्वाचे सर्वात मोठे वैशिष्ट्य आहे.
