बेळगाव लाईव्ह : बेळगाव: शहरातील सदाशिवनगर परिसरात मंगळवारी सकाळी एका ४५ वर्षीय महिलेची धारदार शस्त्राने निर्घृण हत्या करण्यात आल्याने एकच खळबळ उडाली आहे. या घटनेमुळे परिसरात भीतीचे वातावरण पसरले आहे.
मंगळवारी सकाळी सदाशिवनगरमधील लक्ष्मी कॉम्प्लेक्सजवळ महादेवी करेन्नवर या महिलेचा मृतदेह रक्ताच्या थारोळ्यात आढळून आला. मूळच्या मच्छे गावाच्या रहिवासी असलेल्या महादेवी गेल्या सहा-सात महिन्यांपासून मुलासोबत सदाशिवनगर येथील एका भाड्याच्या घरात राहत होत्या. मात्र, दोन दिवसांपूर्वी त्यांचा मुलगा गावी गेला होता. या हत्येची माहिती मिळताच पोलीस आयुक्त भूषण बोरसे आणि पोलीस उपायुक्त नारायण भरमणी यांनी तातडीने घटनास्थळी धाव घेत पाहणी केली.
महादेवी यांचा पती दारूच्या व्यसनात अडकलेला होता. त्यामुळे काही दिवसांपूर्वी त्यांच्यात पैशांवरून मोठा वाद झाला होता. पतीच्या त्रासाला कंटाळूनच त्या मुलासोबत वेगळ्या राहत होत्या. त्यामुळे या हत्येमागे पतीचाच हात असल्याचा संशय नातेवाईकांनी व्यक्त केलाय. मात्र या प्रकरणी मृत महिलेच्या मुलानेही एका वेगळ्या व्यक्तीवर संशय व्यक्त केला आहे. दीड वर्षांपूर्वी एका व्यक्तीला उसने पैसे दिले होते, त्या पैशाची मागणी केली असता काही दिवसांपूर्वी वाद झाला होता. त्यामुळे तो व्यक्ती देखील या हत्येसाठी जबाबदार असू शकतो, असे मृत महिलेच्या मुलाने सांगितले.
घटनेची गंभीरता लक्षात घेता फॉरेन्सिक सायन्स लॅबोरेटरीच्या पथकाला पाचारण करण्यात आले असून त्यांनी घटनास्थळावरून महत्त्वाचे पुरावे गोळा केले आहेत. महादेवी यांचा मृतदेह शवविच्छेदनासाठी बेळगाव जिल्हा रुग्णालयात पाठवण्यात आला आहे. ही घटना एपीएमसी पोलीस ठाण्याच्या हद्दीत घडली असून, पोलीस आरोपींचा शोध घेण्यासाठी कसून तपास करत आहेत.
