बेळगाव लाईव्ह : बेळगावमधील न्यू गांधी नगर आणि अमन नगर भागातील प्रस्तावित रेल्वे उड्डाणपुलाला विरोध करण्यासाठी भीम आर्मी भारत एकता मिशनच्या नेतृत्वाखाली जोरदार निदर्शने करण्यात आली.
या पुलाच्या बांधकामामुळे परिसरातील शेकडो गरीब कुटुंबांना आपली घरे गमवावी लागतील, अशी भीती व्यक्त करत आंदोलकांनी हे बांधकाम रद्द करण्याची मागणी केली आहे.
भीम आर्मी भारत एकता मिशन आणि न्यू गांधी नगर तसेच अमन नगरमधील रहिवाशांनी शनिवारी एकत्र येऊन शहराच्या मध्यभागी असलेल्या चन्नम्मा सर्कलपासून जिल्हाधिकारी कार्यालयापर्यंत एक भव्य मोर्चा काढला.
मोर्चाने जिल्हाधिकारी कार्यालय गाठल्यानंतर त्यांनी जिल्हाधिकाऱ्यांची भेट घेऊन निवेदन सादर केले. विकासकामांच्या नावाखाली गरिबांना बेघर करू नये, अशी मागणी त्यांनी या निवेदनाद्वारे केली आहे.
यावेळी बोलताना भीम आर्मीचे राज्य उपाध्यक्ष मुन्नावर हुसेन यांनी सांगितले की, “विकासकामांच्या नावाखाली गरिबांना रस्त्यावर आणले जात आहे. आम्ही या प्रस्तावित उड्डाणपुलाला तीव्र विरोध करत आहोत. जर हे बांधकाम सुरू झाले आणि त्यामुळे गरीब कुटुंबे बेघर झाली, तर आम्ही हे काम थांबवू.” त्यांच्या या वक्तव्यावरून आंदोलनाचा निर्धार स्पष्ट झाला.
या आंदोलनात भीम आर्मी भारत एकता मिशनचे पदाधिकारी आणि न्यू गांधी नगर तसेच अमन नगरचे शेकडो रहिवासी मोठ्या संख्येने सहभागी झाले होते.
