बेळगाव लाईव्ह : शहरातील सब रजिस्ट्रार कार्यालयावर लोकायुक्त अधिकाऱ्यांनी मोठी कारवाई केली आहे. बेळगावच्या जिल्हाधिकारी कार्यालयाच्या आवारात असलेल्या उत्तर विभागाच्या उपनिबंधक कार्यालयावर हा छापा टाकण्यात आला आहे.
गेल्या अनेक दिवसांपासून या कार्यालयातील कर्मचारी आणि अधिकाऱ्यांविरोधात भ्रष्टाचाराच्या तक्रारी येत होत्या. याच तक्रारींच्या आधारावर लोकायुक्त अधिकाऱ्यांनी ही कारवाई केली आहे.
लोकायुक्त अधिवक्ता शुभवीर जैन यांच्या नेतृत्वाखाली ही धाड टाकण्यात आली असून, वरिष्ठ उपनिबंधक करिबसवनागौडा पी. यांच्यासह कार्यालयातील इतर कर्मचाऱ्यांवर भ्रष्टाचाराचे आरोप आहेत. लोकायुक्त अधिकारी सध्या प्रत्येक कागदपत्राची आणि नोंदीची तपासणी करत आहेत.
या कारवाईत लोकायुक्त सीपीआय आदिवेप्पा बूदिगेप्पा यांच्यासह दहाहून अधिक अधिकाऱ्यांचा समावेश आहे. या छाप्याने सरकारी कार्यालयांमध्ये खळबळ उडाली आहे.