बेळगाव लाईव्ह : गणेशोत्सव अवघ्या काही दिवसांवर आला असून, बेळगाव शहरात गणेशमूर्ती तयार करणाऱ्या कारागिरांची लगबग सुरू झाली आहे. शहरातील प्रसिद्ध मूर्तिकार मनोहर पाटील यांच्या भांदूर गल्लीतील कारखान्यात मूर्तींना अंतिम स्वरूप देण्याचे काम वेगाने सुरू आहे. त्यांच्यासोबत त्यांची दुसरी पिढी अर्थात त्यांची दोन मुले विनायक आणि प्रसाद पाटीलही या कामात व्यस्त आहेत.
मनोहर पाटील हे बेळगावमधील एक नावाजलेले मूर्तिकार असून, त्यांनी अनेक गणेशोत्सव मंडळांसाठी आकर्षक मूर्ती घडवल्या आहेत. यंदाही ते घरगुती तसेच सार्वजनिक मंडळांच्या मूर्ती तयार करत आहेत. मूर्तींना रंग देण्याचे काम सुरू असून, पुढील दोन ते तीन दिवसांत हे काम पूर्ण होईल, अशी माहिती त्यांनी ‘बेळगाव लाईव्ह’ शी बोलताना दिली.
मनोहर पाटील यांच्या कारखान्यात तयार झालेल्या मूर्तींना बेळगाव शहरासह हुबळी आणि बेंगळुरूसह अनेक ठिकाणाहून मोठी मागणी असते. त्यांच्याकडे दोन फुटांपासून तब्बल २१ फुटांपर्यंतच्या मूर्ती तयार केल्या जातात. त्यामुळे लहान मूर्तींपासून ते भव्य मूर्तींपर्यंत सर्व प्रकारच्या मूर्ती त्यांच्याकडे उपलब्ध असतात.
मनोहर पाटील यांनी सांगितले की, ‘गेले अनेक वर्षे आम्ही मूर्ती बनवण्याचे काम करत आहोत. आता माझी दोन्ही मुलेही या व्यवसायात माझ्यासोबत आहेत. बेळगाव शहरातील मंडळांच्या मूर्ती तर आम्ही तयार करतोच, पण आता इतर शहरांतूनही मोठी मागणी येत आहे. त्यामुळे आम्हाला कामगारांचीही मदत घ्यावी लागते. आमच्याकडे दोन ठिकाणी कारखाने असून, सध्या दोन्ही ठिकाणी कामाची लगबग सुरू आहे. पुढील काही दिवसांत या मूर्ती मंडळांपर्यंत पोहोचतील.’
मनोहर पाटील आणि त्यांच्या कुटुंबाची ही कला केवळ एक व्यवसाय नसून, ती पिढ्यानपिढ्या चालत आलेली परंपरा आहे. त्यांच्या हातून घडलेल्या प्रत्येक मूर्तीमध्ये केवळ माती नसून, श्रद्धा आणि कलेचा संगम दिसतो. गणेशोत्सवाच्या तयारीतील ही लगबग खरं तर बेळगावातील कला आणि संस्कृतीचा वारसा जपण्याचं प्रतीक आहे, आज विनायक आणि प्रसाद पाटील त्यांच्या वडिलांच्या पावलावर पाऊल ठेवून मूर्तिकलेचा हा वारसा पुढे नेत आहेत.
त्यांच्यासारखे तरुण कलाकार ही कला जिवंत ठेवत असल्यामुळे, येणाऱ्या अनेक पिढ्यांना अशा सुंदर मूर्तींचे दर्शन घडत राहील यात शंका नाही.