बेळगाव लाईव्ह : बेळगाव जिल्ह्यातील बिजगर्णी-बेळवट्टी रस्त्यावरील कावळेवाडी क्रॉसजवळ घडलेल्या अपघातात १८ वर्षांच्या तरुणीचा मृत्यू झाला आहे. ही घटना बेळगाव जिल्ह्यातील बिजगर्णी-बेळवट्टी रस्त्यावरील कावळेवाडी क्रॉसजवळ घडली असून भरधाव वेगात येणाऱ्या एका कारने दुचाकीला धडक दिल्याने हा अपघात झाला.
या अपघातात ठार झालेल्या तरुणीचं नाव रोहिणी रामलिंग चौगुले (१८) आहे. ती बेळवट्टी येथील रहिवासी होती. दुचाकीवर तिच्यासोबत तिची आई लक्ष्मी रामलिंग चौगुले (४५) आणि मामा सतीश विष्णू मोहिते (४०) हे देखील होते.
हे दोघेही या अपघातात गंभीर जखमी झाले असून, त्यांच्यावर खासगी रुग्णालयात उपचार सुरू आहेत. जखमी अवस्थेत रोहिणीला रुग्णालयात नेत असतानाच तिचा मृत्यू झाला. संबंधित कारचालकावर गुन्हा दाखल करण्याची प्रक्रिया सुरु आहे, अशी माहिती शहर पोलीस आयुक्त भूषण बोरसे यांनी दिली.
पोलिसांनी दिलेल्या माहितीनुसार, कारचालक जुनैद राजगोळी यांच्या विरोधात गुन्हा दाखल करण्याची प्रक्रिया सुरू करण्यात आली आहे. बेळगाव ग्रामीण पोलीस या प्रकरणाचा पुढील तपास करत आहेत. रोहिणीच्या अकाली मृत्यूमुळे तिच्या कुटुंबावर शोककळा पसरली आहे.