बेळगाव लाईव्ह : कर्नाटक राज्याचे पोलीस महासंचालक आणि पोलीस महानिरीक्षक यांच्या कार्यालयाने राज्यातील सर्व पोलीस आयुक्तालय, क्षेत्रीय अधिकारी आणि जिल्हा पोलीस अधीक्षकांना (के.जी.एफ. आणि रेल्वे पोलीस यांच्यासह) एक महत्त्वपूर्ण पत्र पाठवले आहे. या पत्राद्वारे त्यांनी पोलीस ठाण्यांमध्ये येणाऱ्या सर्वसामान्य नागरिकांशी सौजन्याने वागण्याचे सक्त निर्देश दिले आहेत.
माननीय कर्नाटक राज्य मानवाधिकार आयोगाच्या आदेशानंतर हे निर्देश जारी करण्यात आले आहेत. पोलीस ठाण्यात येणाऱ्या कोणत्याही नागरिकाशी गैरवर्तन करू नये आणि त्यांच्या मानवाधिकारंचे उल्लंघन होणार नाही याची काळजी घ्यावी.
या संदर्भात आयोगाने पोलीस अधिकारी आणि कर्मचाऱ्यांसाठी योग्य निर्देश जारी करण्याचे आदेश दिले होते.
आयोगाच्या याच आदेशाचे पालन करत, पोलीस महासंचालकांनी आता राज्यातील सर्व पोलीस ठाण्यांना स्पष्ट सूचना दिली आहे की, यापुढे कोणत्याही नागरिकाने पोलीस ठाण्याला भेट दिल्यास त्यांच्याशी गैरवर्तन करू नये आणि त्यांच्या मानवाधिकारंचा आदर करत सौजन्याने वागावे. या सूचनांचे काटेकोरपणे पालन करण्याचे आदेश देण्यात आले आहेत.
या महत्त्वपूर्ण सूचनेमुळे पोलीस आणि सामान्य नागरिक यांच्यातील संबंध सुधारण्यास मदत होईल, अशी अपेक्षा व्यक्त केली जात आहे.