बेळगाव लाईव्ह : रोजगार हमी योजनेच्या ग्रुपवर स्वतःचे अश्लील छायाचित्र टाकणाऱ्या कुद्रेमानी (ता. जि. बेळगाव) ग्रामपंचायतीचा माजी अध्यक्ष असलेल्या एका विद्यमान ग्रा. पं. सदस्याला काकती पोलिसांनी काल शुक्रवारी अटक करून त्याची रवानगी हिंडलगा कारागृहात केली आहे.
पोलिसांनी अटक केलेल्या विकृत ग्रामपंचायत सदस्याचे नांव संजय यल्लाप्पा पाटील (वय 42, रा. कुद्रेमानी) असे आहे. पोलिसांकडून मिळालेल्या माहितीनुसार कुद्रेमानी ग्रामपंचायतीच्या अखत्यारीत होणाऱ्या रोजगार हमी योजनेच्या कामासंबंधीची माहिती रोज मिळावी यासाठी एक व्हाॅट्स-ॲप ग्रुप तयार करण्यात आला आहे.
या रोहयो ग्रुपवर स्वतः ग्रा.पं. सदस्य संजय पाटील यांच्यासह 13 महिला व तीन पुरुष आहेत. या पद्धतीने ग्रुपवर महिला असल्याची कल्पना असूनही पाटील याने स्वतःचे अश्लील छायाचित्र ग्रुपवर पाठवले. त्याला आक्षेप घेत ग्रुप मधील संतप्त महिलांनी तडक काकती पोलीस ठाणे गाठून पोलिसांना सविस्तर माहिती दिली.
त्यानंतर एका महिलेने दिलेल्या फिर्यादीनुसार पोलिसांनी संजय पाटील याच्यावर भा.द.वि. कलम 57 आयटी कायदा 67 अंतर्गत गुन्हा दाखल केला. तसेच घटनेचे गांभीर्य लक्षात घेऊन पाटील याला तात्काळ अटक करून त्याची रवानगी हिंडलगा कारागृहात केली.