बेळगाव लाईव्ह : “प्रयत्नाचे प्रतीक” म्हणून ओळखले जाणारे भगीरथ महर्षी यांची जयंती बेळगावात एका प्रेरणादायी कार्यक्रमाने साजरी करण्यात आली. अहिंद वकील संघटनेच्या वतीने आयोजित या विशेष कार्यक्रमात सामाजिक ऐक्य, शिक्षणाचे महत्त्व आणि प्रयत्नशीलतेचा मंत्र नव्या पिढीपर्यंत पोहोचवण्याचा प्रयत्न झाला.
कन्नड साहित्य भवन येथे पार पडलेल्या या कार्यक्रमात मागासवर्गीय समाजातील गुणवंत विद्यार्थ्यांचा सत्कार करण्यात आला. केवळ टक्केवारीवर नव्हे, तर त्यांनी जिद्द, चिकाटी आणि संघर्षातून गाठलेली शैक्षणिक शिखरे गौरवण्यात आली.
कार्यक्रमात बोलताना अॅडव्होकेट एन.आर. लातूर म्हणाले, “भगीरथांनी गंगेला पृथ्वीवर आणले, ही केवळ पौराणिक कथा नाही, ती एक सामाजिक संदेश आहे – जे अशक्य वाटते, तेही प्रयत्नांनी शक्य होते.” त्यांनी अहिंद वकील संघटनेच्या कार्याचा आढावा घेत समाजासाठी सुरू असलेल्या लढ्याची आठवण करून दिली. मानव बंधुत्व वेदिकेचे संचालक भऱमण्णा तोळी यांनी विद्यार्थ्यांना उद्देशून सांगितले, “आजही अनेक अडथळे, अन्याय आणि अपमानासमोर आपली वाट अडते, पण भगीरथांनी शिकवले की प्रयत्न थांबवायचे नाहीत.”
या कार्यक्रमात एसएसएलसी व पीयूसी परीक्षांमध्ये विशेष यश मिळवलेल्या अहिंद आणि उप्पार समाजातील विद्यार्थ्यांचा सन्मान करण्यात आला. हा सन्मान केवळ पुरस्कार नव्हता, तर पुढील वाटचालीसाठी दिली गेलेली एक सामाजिक मान्यता होती.
कार्यक्रमाला अहिंद संघटनेचे राज्याध्यक्ष विष्णू लातूर, रेखा लक्कुंडी, अशोक चौहान, मल्लिकार्जुन राजप्पानवर यांच्यासह अनेक मान्यवरांची उपस्थिती लाभली.
