बेळगाव लाईव्ह :बेळगाव शहरातील सीपीएडी मैदानावर काल आयोजित काँग्रेस पक्षाच्या सभेत भाजपच्या महिला कार्यकर्त्यांनी घुसखोरी करून मुख्यमंत्री सिद्दरामय्या यांना काळे झेंडे दाखवून गोंधळ घातल्या प्रकरणी दोघा पोलिस कॉन्स्टेबलांना निलंबित करण्याचा आदेश बेळगाव उत्तर विभागाचे पोलीस महानिरीक्षक (आयजीपी) चेतनसिंग राठोड यांनी बजावला आहे.
खडेबाजार पोलीस ठाण्यातील कॉन्स्टेबल बी. ए. नौकुडी आणि कॅम्प पोलीस ठाण्यातील कॉन्स्टेबल मल्लप्पा हडगिनाळ अशी निलंबित करण्यात आलेल्या पोलिसांची नावे आहेत.
काँग्रेस पक्षाच्या सभेप्रसंगी व्यासपीठ परिसरातील सुरक्षेची जबाबदारी एएसपी, एसपी दर्जाच्या अधिकाऱ्यांवर असताना त्यांना जबाबदार धरण्याऐवजी आयजीपींनी कॉन्स्टेबल दर्जाच्या पोलीस कर्मचाऱ्यांना निलंबित करण्याचा हा प्रकार म्हणजे चिमणीवर ब्रह्मास्त्राचा वापर करण्यासारखे असल्याचे बोलले जात आहे.
विशेष म्हणजे निलंबित झालेले दोघे कर्मचारी व्यासपीठा जवळील सुरक्षा व्यवस्थेत तैनातच नव्हते. बी. ए. नौकुडी राणी कित्तूर चन्नम्मा सर्कल येथे तर मल्लप्पा हडगिनाळ अन्यत्र सेवा बजावत होते, अशी माहिती उपलब्ध झाली आहे.
मात्र असे असूनही त्यांच्यावर निलंबनाची कारवाई करण्यात आल्यामुळे हा चर्चेचा विषय झाला आहे. गुप्त माहिती गोळा करून निदर्शनांची कारवाई रोखण्यात अपयश आल्यामुळे कारवाई करण्यात आली आहे, असे निलंबन आदेशात नमूद आहे.