बेळगाव लाईव्ह :बेळगावच्या क्रेडाई या बांधकाम व्यावसायिक संघटनेतर्फे नूतन महापौर मंगेश पवार आणि उपमहापौर विणा जोशी यांचा काल सत्कार करण्यात आला. याप्रसंगी ई-अस्थी आणि कायमस्वरूपी भाडेपट्टी या मुद्द्यांवर चर्चा होऊन महापौर मंगेश पवार यांनी पालिकेच्या आजच्या बैठकीत चर्चा करून त्यावर तोडगा काढण्याचे आश्वासन दिले.
क्रेडाई बेळगावचे अध्यक्ष युवराज हुलजी यांच्या नेतृत्वाखाली क्रेडाईच्या अन्य पदाधिकारी व सदस्यांच्या शिष्टमंडळाने काल शुक्रवारी बेळगाव महापालिकेला भेट देऊन महापौर व उपमहापौरांची भेट घेतली. तसेच शाल पुष्पगुच्छ व भेटवस्तू देऊन महापौर मंगेश पवार व उपमहापौर विणा जोशी यांचा सत्कार केला. सदर सत्काराचे औचित्य साधून क्रेडाईच्या पदाधिकाऱ्यांनी जनतेला भेडसावणाऱ्या काही समस्या महापौरांसमोर मांडल्या. ई-अस्थीची काहीशी त्रासदायक असलेली प्रक्रिया सुलभ करावी.
त्याचप्रमाणे ई-अस्थी संदर्भात ब्रिटिश कालीन आणि स्वातंत्र्योत्तर काळातील जुन्या इमारतींना परवाना पत्राची मागणी केली जात आहे. त्या काळात परवाना पत्र देण्याची पद्धत नव्हती. त्यावेळी पीआयडी नंबर वगैरे आवश्यक सरकारी नोंदी असायच्या, त्यामुळे त्यामुळे जुन्या इमारतींसाठी परवाना पत्राची सक्ती न करता प्रक्रिया सुलभ करून दिली जावी. नागरिकांना मनस्ताप देणारी सर्व्हर डाऊनची समस्या दूर करावी. याव्यतिरिक्त ‘सूर्य चंद्र असेपर्यंत जमीन तुमची’ अशा कायमस्वरूपी दीर्घ मुदतीच्या करारावर (लीज) टिळकवाडीतील कांही जागा सार्वजनिकांसाठी देण्यात आल्या आहेत.
मात्र सरकारी दस्तावेजात जमीनचे मालक व भाडेकरू या दोन्ही ठिकाणी महापालिकेचे नांव आहे. त्यामुळे सध्याच्या कावेरी -2 प्रणालीच्या माध्यमातून संबंधित जागांच्या विकासासाठी बँकांकडून कर्ज उपलब्ध होण्यास अडचण निर्माण होत आहे. याकरिता जमीन मालक म्हणून महापालिकेचे नांव ठेवावे आणि भाडेकरू म्हणून क्रेडाईचे नांव नोंदवावे, अशी विनंती यावेळी करण्यात आली.
सदर सर्व मुद्दे ऐकून घेऊन ते मुद्दे आज होणाऱ्या महापालिकेच्या बैठकीमध्ये मांडून योग्य तो निर्णय घेतला जाईल असे आश्वासन महापौर मंगेश पवार यांनी दिले. महापौरांप्रमाणे क्रेडाई पदाधिकाऱ्यांनी शहराचे आमदार असिफ राजू सेठ यांची देखील भेट घेऊन उपरोक्त मागण्या त्यांच्यासमोर मांडल्या. त्यांनी देखील आजच्या महापालिका बैठकीत त्यावर चर्चा केली जाईल असे आश्वासन दिले.
त्याचप्रमाणे येत्या 15 एप्रिलनंतर संबंधित सर्वांची एक अधिकृत बैठक घेऊन तुमच्या समस्या दूर केल्या जातील अशी ग्वाही आमदार सेठ यांनी क्रेडाई पदाधिकाऱ्यांना दिली.
