बेळगाव लाईव्ह : चंदगड, कोंकण, गोवा यासह बेळगाव शहर, उपनगर, तालुक्यातील विविध गावांना बाजरपेठेला जोडणाऱ्या शहरातील मुख्य प्रवेशद्वार असलेल्या, महत्वाच्या चौकांपैकी एक असणारा यंदे खुट येथील मोडकळीस आलेला सिग्नल सहा महिने उलटूनही उभारण्यात न आल्याने तीव्र नाराजी व्यक्त करण्यात येत होती. यासंदर्भात ‘बेळगाव लाईव्ह’ ने सातत्याने पाठपुरावा करत सिग्नल यंत्रणा पूर्ववत उभारण्याची मागणी करणारे वृत्त प्रकाशित केले होते. ‘बेळगाव लाईव्ह’ वर प्रकाशित झालेल्या वृत्ताची दखल घेत अखेर सदर सिग्नल यंत्रणा पूर्ववत सुरु करण्यात आली असून याबाबत नागरीकातून समाधान व्यक्त होत आहे.
जुलै २०२४ मध्ये परतीच्या पावसादरम्यान मोडकळीस आलेल्या सिग्नलच्या खांबाला वाहन येऊन धडकल्याने आधीच मोडकळीस आलेला खांब पूर्णपणे कोसळला होता. परिणामी या भागात मोठ्या प्रमाणात वाहतुकीच्या समस्या उद्भवत होत्या.
शहरातील मुख्य बाजारपेठेला जोडणाऱ्या या चौकातून दररोज हजारो वाहनांची वर्दळ होते. चन्नम्मा चौकातून धर्मवीर संभाजी चौक मार्गे पुढील उपनगरांच्या दिशेने तसेच धर्मवीर संभाजी चौक मार्गे चन्नम्मा चौकाच्या दिशेने जाणारी असंख्य वाहने, चंदगड भागातून मोठ्या प्रमाणात बाजारपेठेत दाखल होणारी वाहने, याच परिसरात असलेल्या शाळा – महाविद्यालयासाठी येणाऱ्या विद्यार्थ्यांची वाहतूक यासह शहरातील प्रमुख चौक असल्याने मध्यवर्ती ठिकाण म्हणून ओळखला जाणारा हा चौक सध्या सिग्नल यंत्रणेविना धोकादायक ठरला होता. या भागात अनेकवेळा रहदारी पोलीस हजर असतात. मात्र बहुसंख्यवेळा या पोलिसांचे वाहतूक नियंत्रणात दुर्लक्ष झाल्याचेही दिसून आले. परिणामी अनेकवेळा वाहतूक कोंडी, अपघात यांचे प्रमाण वाढत असल्याचेही निदर्शनात आले.
या परिसरात असलेल्या शाळा– महाविद्यालयांच्या विद्यार्थ्यांना याचा सर्वाधिक फटका बसत होता. याचप्रमाणे सायंकाळच्या वेळेस वर्दीतील रिक्षा, सायकल वरून प्रवास करणारे विद्यार्थी, यासह बस, ट्रक, चारचाकी अशा असंख्य वाहनांची मोठी कोंडी देखील होत होती. याठिकाणी होणाऱ्या वाहतूक कोंडीचा फटका केवळ वाहनधारकांनाच नाही तर पादचाऱ्यांनाही मोठ्या प्रमाणात बसत होता.
वाहतूक कोंडी, बेशिस्त वाहनचालकांमुळे अनेक अपघात असे प्रसंग अनेकवेळा घडत असल्याने लवकरात लवकर पुन्हा सिग्नल सुरू करावा, अशी मागणी वाहनचालकांतून केली जात होती. नागरिकांच्या मागणीसह ‘बेळगाव लाईव्ह’ ने केलेल्या पाठपुराव्याची दखल घेत अखेर यंदे खूट येथील सिग्नल यंत्रणा पूर्ववत सुरु करण्यात आल्याने नागरीकातून समाधान व्यक्त होत आहे.
20 फेब्रुवारी रोजी प्रसिद्ध केलेली हीच ती बातमी त्याचा impact झाला आहे.
यंदे खुट येथील सिग्नल यंत्रणा सुरू करण्याची मागणी
