बेळगाव लाईव्ह : दिल्लीत केंद्रीय मंत्री कुमारस्वामी आणि सतीश जारकिहोळी यांची गुप्त भेट झाल्याने या बैठकीत नेमके काय घडले, कोणत्या गोष्टींवर चर्चा झाली याबाबत राजकीय कुतूहल वाढले आहे. कर्नाटकातील राजकीय परिस्थिती अस्वस्थ असताना, दिल्लीत केंद्रीय मंत्री आणि जनता दल (धर्मनिरपेक्ष) [जेडीएस] नेते एच.डी. कुमारस्वामी आणि राज्याचे मंत्री सतीश जारकिहोळी यांची गुप्त भेट झाल्याची बातमी समोर आली आहे. या भेटीत दोघांनी एकत्र जेवण केले असून, यामुळे राजकीय वर्तुळात चर्चा सुरू झाली आहे.
अधिकृत पातळीवर न घोषित केलेल्या या भेटीत, कुमारस्वामी यांनी त्यांच्या दिल्लीतील निवासस्थानी जेवणाची मेजवानी आयोजित केली होती. या मेजवानीसाठी सतीश जारकिहोळी हजर होते. जारकिहोळी गेल्या काही दिवसांपासून दिल्लीत आहेत आणि त्यांनी कुमारस्वामी यांच्याशी विविध विषयांवर चर्चा केल्याची माहिती देखील उपलब्ध झाली आहे. कर्नाटकात सत्ताधारी काँग्रेस आणि जेडीएस यांच्यात तणावाचे वातावरण असताना अशा परिस्थितीत झालेली भेट यामुळे चर्चांना उधाण आले आहे.
कुमारस्वामी हे जेडीएसचे वरिष्ठ नेते असून, ते सध्या केंद्र सरकारमध्ये मंत्री आहेत. तर सतीश जारकिहोळी काँग्रेस-नेतृत्वातील सरकारमध्ये मंत्री आहेत. अशा पार्श्वभूमीवर, या दोन नेत्यांची एकत्रित भेट राज्याच्या राजकारणात नवीन समीकरण निर्माण करू शकते का, याबाबत विश्लेषक चर्चा करत आहेत. या डिनर मीटिंगबाबत कुमारस्वामी किंवा जारकिहोळी यांनी अद्याप कोणतीही स्पष्टीकरणे दिलेली नाहीत. मात्र, राज्यातील विरोधी पक्षांकडून या भेटीवर प्रतिक्रिया येण्याची शक्यता आहे. सोशल मीडियाच्या माध्यमातून डिनर पार्टीदरम्यानचे फोटो वायरल झाल्यानंतर मंत्री सतीश जारकीहोळी यांनी यासंदर्भात आपण राज्यात परत आल्यानंतर स्पष्टीकरण देऊ असे सांगितले आहे.
दिल्लीत होणाऱ्या अशा गुप्त बैठकी आणि भेटी सहसा राजकीय महत्त्वाच्या असतात. कर्नाटकातील वर्तमान राजकीय परिस्थिती लक्षात घेता, कुमारस्वामी आणि जारकिहोळी यांच्या या संवादामुळे भविष्यात नवीन राजकीय घडामोडी होऊ शकतात का, हे पाहणे रंजक ठरेल.
