बेळगाव लाईव्ह : पक्षातील वरिष्ठ नेत्यांविषयी सातत्याने वादग्रस्त विधाने करत, कठोर शब्दात टीकाटिप्पण्या करून आपल्याच पक्षातील नेत्यांविरोधात बंड पुकारणारे विजयपूरचे आमदार बसनगौडा पाटील यत्नाळ यांच्यावर पक्षश्रेष्ठींनी चांगलीच नाराजी व्यक्त केली असून पक्षातून तब्बल ६ वर्षांसाठी आम. यत्नाळांना निलंबित करण्यात आले आहे. वरिष्ठ नेते, पक्षाविरोधातील विधानांमुळे अखेर पक्षश्रेष्ठींनी कठोर निर्णय घेतला असून यत्नाळांना कारणे दाखवा नोटीस बजावण्यात आली आहे.
विजयपूरचे भाजप आमदार बसनगौडा पाटील यत्नाळ यांना पक्षाविरोधातील सातत्यपूर्ण भूमिकेमुळे त्यांना पक्षातून बाहेरचा रस्ता दाखविण्यात आल्याने भाजपमध्ये मोठी चर्चा रंगली आहे.
कोणत्याही नेत्याने शिस्तभंग, पक्षविरोधी भूमिका आणि वरिष्ठ नेत्यांवर आरोप केल्यास भविष्यातही अशीच कठोर कारवाई केली जाईल असे पक्षश्रेष्टींनीं स्पष्ट केले आहे.
भाजपच्या केंद्रीय शिस्त समितीचे सचिव ओम पाठक यांनी हा अधिकृत आदेश जारी केला असून, यत्नाळांवर करण्यात आलेल्या या कारवाईनंतर राज्याच्या राजकारणात उलथापालथ होण्याची शक्यता आहे. यत्नाळ आता स्वतंत्र राजकीय वाटचाल सुरु करणार की दुसऱ्या पक्षात प्रवेश करणार? पक्षातून हकालपट्टीनंतर यत्नाळ यांची पुढील राजकीय वाटचाल काय? याकडे सर्वांचे लक्ष लागले आहे.
