बेळगाव लाईव्ह : शनिवारी दुपारी ऑटो चालकाने केलेल्या मारहाणी नंतर मृत्यू झालेले गोव्याच्या माजी आमदारांचे पार्थिव शनिवारी रात्रीच गोव्यात पोहोचले. मुख्यमंत्री प्रमोद सावंत यांनी लवू मामलेदार यांना न्याय मिळवून देण्याचे आश्वासन दिलं आहे.
१५ फेब्रुवारी रोजी बेळगावात मारहाणीत झालेल्या मृत्यू नंतर लवू मामलेदार यांचे पोस्टमॉर्टम बेळगाव येथे झाल्यानंतर त्यांचे पार्थिव गोव्यात आणण्यात आले. पोस्टमॉर्टम अहवालात मृत्यूचे नेमके कारण नमूद केले जाणार आहे.
मामलेदार यांचे कुटुंबीय शनिवारी सायंकाळी पोहोचले होते त्या दरम्यान, बेळगाव पोलिसांनी २८ वर्षीय रिक्षा चालक मुजाहिदीन शकील जमादार यावर माजी आमदाराचा खून केल्या प्रकरणी गुन्हा दाखल करत त्याची रवानगी हिंडलगा कारागृहात केली आहे.
शनिवारी दुपारी खडे बाजार येथील लॉज समोर बेळगाव येथे रिक्षा चालका सोबत झालेल्या भांडणात मामलेदारांवर हल्ला झाल्यानंतर ते कोसळल्यामुळे त्यांचा मृत्यू झाला होता. पोस्टमॉर्टम अहवालात माजी आमदार मामलेदार यांच्या मृत्यूचे नेमके कारण स्पष्ट होईल. दरम्यान, मुख्यमंत्री प्रमोद सावंत यांनी मामलेदार यांच्या निधनावर शोक व्यक्त केला आणि सांगितले की गोवा प्रशासन बेळगाव प्रशासनाशी संपर्कात आहे आणि मामलेदार यांना न्याय मिळेल तसेच दोषी व्यक्तीला शिक्षा होईल याची आम्हाला खात्री आहे.
गोव्याचे लोक दर आठवड्याला खरेदीसाठी बेळगावला येत असतात त्यामुळे बेळगावच्या जनतेनी व्यापाऱ्यानी आणि पोलिसांनी देखील गोवेकर यांच्या सोबत सौजन्याने वागावे अशी चर्चा संध्या सोशल मिडिया ट्रेंड मध्ये होऊ लागली आहे.अश्या गोष्टी मुळे बेळगावची प्रतिमा मलिन होऊ नये गोवा बेळगाव व्यापारी संबंधावर फरक देखील पडू नये असेही मत समाज माध्यमांवर व्यक्त होताना दिसत आहे.
